22 траўня жыхары вёскі Патока ў гміне Міхалова і іх нашчадкі ўжо пяты раз сабраліся на месцы, дзе калісь стаяла царква, каб памаліцца за бязвінных ахвяр жудасных падзеяў у 1945 г. Тады – 16 траўня – салдаты польскага ўзброенага падполля пад камандаваннем маёра Зыгмунта Шэндзеляжа (псеўданім „Лупашка”) расстралялі чатырох жыхароў Патокі. Нявінна згінулі браты Ян і Уладзімір Малашэўскія ды Ян і Уладзімір Бэкішы (бацька і сын). Праз пару дзён – 22 траўня – атрад  „Лупашкi”, якім кіраваў Зыгмунт Блажэевіч, псеўданім „Зыгмунт”, спаліў вёску. У пажары згарэла трое дзяцей Герасімчукаў – Мікалай – 10 гадоў, Ніна – 8 гадоў, Яўгенія – 6 гадоў, праз два дні памёр яшчэ абгарэлы Міхал Герасімчук (39 гадоў). 75-я гадавіна гэтых злачынстваў адзначалася паніхідай у новай капліцы, якую на месцы колішняй царквы пабудаваў прадпрымальнік Андрэй Шум.

Фота Радыё Рацыя