У Фейсбуку распаўсюдзіў я цудаўнае фота з даваенных Крынак, якое паставіў Томэк Вісьнеўскі, які гадамі займаецца даследаваннем і папулярызацыяй жыдоўскай перадусім тэматыкі. Напісаў ён, што фота прадстаўляе Юзэфа дэ Вірыёна, апошняга ўласніка маёнтку ў Крынках. Для мяне было гэта сенсацыйнае адкрыццё. Калі пабачыў элегантнага маладога мужчыну на крынскім рынку, апранутага паводле тадышняй варшаўскай моды, адразу падзяліўся фота ў некалькіх месцах. Усюды выклікала яно эйфарыю каментароў і падабайкаў.
Гэта стала таксама для мяне нагодай распавесці пра тое, як „Вір’яна” запамяталі жыхары майго Паўднёвага Вострава. Мой бацька расказываў, што яго бачыў. „Вір’ян” у Крынках бываў рэдка, пражываў, працаваў і гуляў у Варшаве. Яго маёнтак за даўгі часткова пераняў віленскі банк. На спрыяльных умовах распрадаваў ён поле пад Рахавікам. Два гектары купіў між іншым мой сусед і далёкі сваяк у Востраве, таксама Хмялеўскі. Людзі ў вёсцы адразу празвалі яго – „Панічык”…
Хутка аказалася, што фота прадстаўляе, на жаль, іншага чалавека. Памылку выправіла Цэцылія Бах-Шчавінская з Крынак, вядомая даследчыца мясцовай гісторыі.
Юрка Хмялеўскі
