29 траўня ў вёсцы Падбаравіска ў гміне Нараў Музей і асяродак беларускай культуры ў Гайнаўцы сарганізаваў першы ў сёлетнім сезоне фэст з цыклу „І там жывуць людзі”. На сцэне выступілі гайнаўскія гурты „Метро”, „Давід Шымчук Бэнд”, „Максім” і „Родны кут” з Нарвы.

Большасць гэтых выканаўцаў можна было пачуць 2 чэрвеня, у дзень праваслаўнага свята Ушэсця (Вазнясення Гасподняга), падчас другога фэсту ў Дубінах. Тады праводзіўся таксама збор грошай для Дому міласэрнасці „Самарытанін” у Гайнаўцы, бо і там – як падкрэслівалі арганізатары – жывуць людзі, толькі пажылыя і больш самотныя.

Трэці фэст адбыўся 12 чэрвеня ў Пятроўшчыне Кляшчэляўскай гміны, а чарговыя запланаваныя м. інш. 31 ліпеня ў Новай Луцэ (гміна Нараўка) і 6 снежня ў Падсвежанцы (гміна Чыжы).

Ужо 14-ты год арганізатары ў супрацоўніцтве з мясцовымі самаўрадамі ладзяць такія мерапрыемствы ў абезлюднелых вёсках на Гайнаўшчыне і Бельшчыне. Іх мэта – развесяленне нешматлікіх жыхароў, часта больш часовых як пастаянных, беларускімі песнямі і гэтым прыпомніць культуру, традыцыю і спадчыну продкаў. Пры нагодзе могуць яны ўдзельнічаць у конкурсах з узнагародамі, набываць беларускія кніжкі і рукадзелле.

Цыкл фэстаў „І там жывуць людзі” арганізаваны пры фінансавай падтрымцы Міністэрства ўнутраных спраў і адміністрацыі, з бюджэту Падляшскага ваяводства, Павятовага староства ў Гайнаўцы ды іншых спонсараў.