23 лістапада юбілей 55-годдзя адзначыў славуты беларускі хор «Васілёчкі» з Бельска-Падляшскага. З увагі на тое, што будуецца новы будынак Бельскага дома культуры, урачыстасці адбыліся ў Пачатковай школе н-р з дадатковым навучаннем беларускай мовы імя Яраслава Кастыцэвіча. Прысутныя былі м.інш. ваявода падляшскі Багдан Пашкоўскі, дэпутат Сейма Яўген Чыквін, віцэ-маршалак ваяводства Марэк Маліноўскі, бургамістр Бельска Яраслаў Бароўскі і войт Бельскай гміны Раіса Раецкая. Апрача юбіляраў на сцэне выступілі калектыў «Вечарына» з Кобрына і «Арляне» з Орлі.

Калектыў «Васілёчкі» існуе з 1964 г. Пад такой назвай выступае з 1973 г. Яна ад песні «Расцвіталі ў полі васілёчкі» беларускага кампазітара Міколы Куліковіча, які жыў тады ў ЗША. Гэту песню знайшоў Сяргей Лукашук, шматгадовы мастацкі кіраўнік хору. Цяпер, таксама ўжо шмат гадоў, з’яўляецца ім Мікалай Фадзін, які даязджае з Гродна, а яго жонка Галіна ў калектыве з’яўляецца харэографам. Арганізацыйна кіруе ім Ніна Бялецкая. Цяпер у хоры спявае каля 30-ці асоб. Дагэтуль даў ён звыш 1200 канцэртаў у Польшчы і па-за межамі краіны.

З юбілеем, «Васілёчкі!»