
Фота з Інтэрнету
15 лістапада былі абвешчаны лаўрэаты сёлетніх узнагарод Маршалка Падляшскага ваяводства ў галіне культуры. Агулам было іх адзінаццаць. Упершыню такая ўзнагарода прысвоена была прадстаўніку беларускай дыяспары. Атрымаў яе вядомы беларускі пісьменнік Уладзімір Арлоў, які з-за палітычных прычын апынуўся ў Польшчы. Быў ён узнагароджаны за „ўсе дасягненні ў галіне прозы і паэзіі”. Прадстаўлены як „адзін з самых вядомых і папулярных сучасных беларускіх пісьменнікаў, гісторык, аўтар некалькіх дзясяткаў кніг мастацкай і дакументальнай прозы, вершаў і эсэісткі”.
Уладзімір Арлоў у мінулых гадах стаў лаўрэатам многіх прэмій – балгарскай «Алеко», міжнароднай прэміі «Еўрапейскі паэт свабоды» (Гданьск, Польшча), імя Алеся Адамовіча, імя Францішка Багушэвіча, імя Ежы Гедройца і іншых.
Узнагароды Маршалка Падляшскага ваяводства у гэтым годзе атрымалі яшчэ – ужо ад нашай меншасці – кіраўнік мужчынскага хору „Куранты” з Бельска-Падляшскага Аліна Негярэвіч („за ўсю мастацкую дзейнасць”) і моладзевы хор сабору св. Мікалая ў Беластоку.
Астатнія восем лаўрэатаў гэта пераважна энтузіясты польскага музычнага фальклору, м.інш. з раёну Сувалкаў і Ломжы.
– Гэтыя ўзнагароды – выраз прызнання падляшскай мясцовай улады, наш спосаб ушанавання і падзякі тым творцам, якія спрыяюць развіццю і ахове культуры нашага рэгіёну, – сказаў маршалак Падляшскага ваяводства Артур Касіцкі.
Кожны лаўрэат атрымае 10 тыс. злотых.











