Кніга нашай сяброўкі Ганны Кандрацюк (на здымку) „У прысценку старога лесу. Гісторыі людзей з Белавежскай пушчы” атрымала галоўную літаратурную прэмію імя Ежы Гедройца 2023 г. – была прызнана журы лепшай з беларускамоўных кніг, выдадзеных у 2022 г.
Цырымонія прайшла 25 лістапада ў Двары Артуса ў Гданьску. Ганна Кандрацюк пасля ўручэнні ёй гэтай прэстыжнай прэміі сказала:
– Адчуваю такую спакойную радасць і хачу сказаць, што гэтую ўзнагароду ўспрымаю, як прызнанне для маіх герояў і для Белавежскай пушчы. Гэта проста доказ, што мы яшчэ не выдахаліся, што мы маем свае ідэі, маем свае тэмы. Перш за ўсё мы людзі, якія любяць літаратуру, якія любяць мастацтва. Так што мы рэалізуем сябе так, як іншыя людзі ў кожным іншым цывілізаваным месцы. Тое, што робім гэта ва ўмовах нацыянальнай меншасці, дае для нас пазітыўны зарад, што варта захаваць сваю душу, што варта быць верным свайму паходжанню і мове.
Прэмія за найлепшую беларускую кнігу імя Ежы Гедройца ўручаецца з 2012 г. з ініцыятывы Пасольства Польшчы ў Мінску і яе Польскага інстытуту. Арганізатарам з’яўляюцца беларускі ПЭН-цэнтр і Міжнародны саюз беларускіх пісьменнікаў. Сярод лаўрэатаў мінулых гадоў былі такія вядомыя аўтары, як Уладзімір Някляеў і Зміцер Бартосік. У 2019 г. другое месца атрымаў Міхал Андрасюк з Гайнаўкі за кнігу „Поўня”, якую таксама, як і кнігу Ганны Кандрацюк, выдаў тыднёвік „Ніва”.
У сувязі з палітычнай сітуацыяй у Беларусі і рэпрэсіямі з боку рэжыму Лукашэнкі прэмія імя Ежы Гедройца ад некалькіх гадоў уручаецца ў Польшчы.
Шчыра віншуем нашу сяброўку з атрыманай ёю прэстыжнай ўзнагародай!
Фота Радыё Рацыя
