Ля царквы святога архангела Міхаіла ў Вульцы-Выганоўскай, што ў гміне Орля, 21 лістапада – у дзень свята нябеснага патрона храму – урачыста быў адкрыты і высвечаны памятны аналой з нагоды святкаванняў Года Супрасльскага кодэксу. Такім абвясціў 2023 г. Сеймік Падляшскага ваяводства ў 200-годдзе адкрыцця гэтага гістарычнага старыннага славянскага манускрыпту з ХІ ст. прафесарам Міхалам Баброўскім, які нарадзіўся ў гэтай вёсцы на Бельшчыне. Аналой-помнік усталяваны побач магілы бабулі (маці айца) прафесара.
Такую ідэю задумаў Яўген Семянюк, беларускі краязнаўца з Беластоку, па прафесіі архітэктар (ужо на пенсіі). Ён родам Рыгораўцаў, што ў прыходзе Вулька-Выганоўская. У Фейсбуку вядзе старонку, прысвечаную сваёй вёсцы. Вядомы таксама як аўтар тэкстаў у „Часопісе”.
