22 чэрвеня праф. Лявон Тарасэвіч атрымаў пачэснае званне доктара honoris causa Універсітэту ў Беластоку. Гэта вялікая прэстыжная падзея таксама для нашага беларускага асяроддзя, паколькі ёсць ён адным з нас і надта прыслужыўся сваім мастацтвам і шматлікімі грамадскімі ініцыятывамі дзеля беларускасці на Беласточчыне.
Мастак з Валілаў каля Гарадка, дзе жыве, у сваім жыцці зрабіў вялікую кар’еру ў Польшчы і на свеце. Беластоцкі ўніверсітэт уганараваў цяпер яго за „безупынныя пошукі новых мастацкіх выклікаў, пераадольванне культурных, гістарычных і палітычных бар’ераў і межаў”.
Урачыстасць была вельмі шматлюднай. Апрача ўніверсітэцкага асяроддзя прысутнічалі сябры і знаёмыя мастака з Падляшша і Польшчы. Былі таксама палітыкі, але чамусьці толькі з апазіцыі. Прыехаў нават шэф Грамадзянскай платформы Дональд Туск.
Праф. Лявон Тарасэвіч як Ганаровы доктар меў свой даклад, у якім дзяліўся думкамі і рэфлексіямі пра мастацтва і культуру ў Польшчы, на Падляшшы і ў свеце. Накaнец сказаў пра свае мары, спадзяванні і пастулаты. Адным з іх было жаданне, каб Універстэт у Беластоку пераназваць на Універсітэт Зыгмунта Аўгуста. Мінулай восенню прапанова прысвоіць імя польскага караля і князя Вялікага Княства Літоўскага, на жаль, не атрымала дастатковай колькасці галасоў ва ўніверсітэцкім сенаце.
Суправаджэннем урачыстасці прысваення ганаровага звання мастаку была выстава яго працаў пачынаючы са школьных гадоў па карціны, якія прэзентаваліся ў галерэях Варшавы, Стакгольму, Нью-Ёрку і Дубаю.
Дагэтуль званне доктараr honoris causa беластоцкага ўніверсітэту было прысвоена 22 асобам, між іншым Ежы Максімюку і уладыку Саве.
Віншуем. Дзякуем, Лёнік!
