3 чэрвеня нечакана памёр Лукаш Сцепанюк „Стэп”, шчыра аддадзены беларускай справе радыёжурналіст. Яму было толькі 44 гады.

„Стэп” нарадзіўся ў Бельску-Падляшскім, там закончыў белліцэй імя Браніслава Тарашкевіча. Як толькі ўзрос, адразу ўключыўся ў дзейнасць новага пакалення беларусаў на Беласточчыне. Быў сябрам Зьвязу Беларускай Моладзі і Беларускага аб’яднання студэнтаў, таксама адным са старшынёў гэтай арганізацыі. Суарганізатар многіх выпускаў Фестывалю Музыкі маладой Беларусі „Басовішча”.

Прафесійнае жыццё прысвяціў радыёжурналістыцы. Супрацоўнічаў з Беларускім Радыё Рацыя ад пачатку яго існавання. Вядомы слухачам як Dj Zona быў аўтарам музычных перадач „Сусветны хіт” і „Шчаслівая трынаццатка”, гукарэжысёрам іншых.

Працаваў у беластоцкай рэдакцыі радыё ESKA таксама з самога пачатку існавання аддзелу. Чытаў там навіны і збіраў інфармацыі як рэпартэр.

Лукаш Сцепанюк займаўся таксама відэа- і гукаапрацоўкай для Фонду „Камунікат”, якога быў намеснікам. Займаўся між іншым запісам аўдыёкніг пры выкарыстанні таксама хатняй (прафесійнай) апаратуры.

Усе супрацоўнікі і сябры ўспамінаюць „Стэпа” надта ветліва. Быў заўсёды аптымістычны, вясёлы. Добры чалавек, дасканалы супрацоўнік, дапамагаў іншым.

Добра ведаў беларускую музыку. Стварыў нават сайт, дзе змяшчаў запісы, у тым ліку якія сам рабіў з канцэртаў. Гаварыў нават, што звычайны паляк больш ведае пра беларускую музыку, чымсьці шэраговы беларус пра польскую. Ён пашыраў кола гуртоў і выканаўцаў, з якім знаёміў слухачоў на Радыё Рацыя.

Пасля развітальнай Святой літургіі ў беластоцкім саборы спачыў на праваслаўных могілках у родным Бельску. Пакінуў жонку і сына.

Бывай, Стэпе, дзякуем за ўсё! Спачывай з мірам. Родным і блізкім словы спачування.