З 1 па 30 красавіка ў адной выбранай гміне з кожнага з 16-ці ваяводстваў прайшоў пробны перапіс насельніцтва, які ў Польшчы запланаваны на 2021 год. На Падляшшы дзеля гэтага Галоўная Статыстычная Управа вызначыла гміну Дубічы-Царкоўныя. Таму, што яна спецыфічная – налічвае няшмат жыхароў, у большасці пенсіянераў, а 60 прац. насельніцтва гэта праваслаўныя і беларусы.
Фота з Вікіпедыі
З увагі на пандэмію каронавіруса, каб запэўніць бяспеку анкетаваным і супрацоўнікам статыстычнай управы, пробны перапіс адбыўся выключна за пасрэдніцтвам інтэрнету і тэлефоннай сувязі. Спачатку ў Дубіцкай гміне гэтага крыху пабойваліся, асабліва пажылыя людзі. Але дзякуючы дапамозе дзяцей, унукаў і суседзяў, пры мабілізацыі насельніцтва і гміннага самаўраду, перапісалася ажно звыш 70 прац. жыхароў. Гэта адзін з найбольшых паказчыкаў у краіне. Каля 30 прац. асоб, якія прыступілі да перапісу, зрабілі гэта пры дапамозе інтэрнету.
