Магчыма што адноўлены будзе, але ў змененым фармаце, фестываль Басовішча, які з- за арганізацыйных праблем скончыўся ў 2019 г. на юбілейным 30-тым выпуску. Вось беластоцкі фонд „Tutaka” – наша свежая і ўжо надзвычай дзейная беларуская арганізацыя – абвясціла нядаўна свае планы паклікання шматвектарнай культурнай імпрэзы ў тым жа месцы, у якім праходзіла Басовішча. У славутым Барыку ў Гарадку меліся б аднак адбывацца не толькі музычныя канцэрты.

У перадачы „Пад знакам Пагоні” ў Польскім радыё Беласток старшыня фонду Павел Станкевіч сказаў, што фестываль плануецца ў шырэйшым фармаце – каб паказваць розныя віды культуры і спадчыны блізкія беларусам і заадно суседзям палякам, украінцам, літоўцам… Мэтай мае быць папулярызацыя таксама мастацтва, літаратуры, а на гэтым фоне беларускай мовы, каб паказаць, якая яна прыгожая.

Магчыма ў назве паслябасовішчанскага фестывалю будзе слова „Tutaka” як марка-брэнд арганізатараў і надта адпавядаючае, як яны лічаць, яго ідэі. Мае быць гэта маштабная імпрэза не толькі для беларусаў – тутэйшых і з Беларусі – але таксама іх суседзяў. Каб яднаць іх і паказваць шматкультурнасць у спасылцы на традыцыі Вялікага княства Літоўскага.

Сябры фонду „Tutaka” намерваюцца ініцыяваць новы фестываль яшчэ ў гэтым годзе, калі толькі дазволіць на гэта сітуацыя, найперш каранавірусныя абмежаванні.