30 сакавіка Мінскі гарадскі суд прыгаварыў вядомага беларускага мастака і перформера Алеся Пушкіна на пяць гадоў зняволення. Быў ён арыштаваны роўна год раней. Супраць яго пракуратура завяла крымінальную справу ў суваязі з тым, што паказаў на выставе ў Гродне намаляваны ім партрэт пасляваеннага антысавецкага змагара Яўгена Жыхара, які ваяваў супраць бальшавіцкай улады на Пастаўшчыне, а падчас акупацыі супрацоўнічаў з немцамі. Гэта стала падставай абвінавачання мастака ў „рэабілітацыі і апраўданні нацызму”. Яшчэ дадалі да гэтага здзек над дзяржаўнымі сімваламі Рэспублікі Беларусь, да якога нібыта ён дапусціўся падчас свайго перформенсу 21-24 сакавіка 2021 г. у Кіеве.

Пушкіна затрымалі ў вёсцы Жылічы Кіраўскага раёну – у царкве, у якой якраз выконваў рэстаўрацыйную працу. Калі адмовіўся пайсці ў машыну, сілавікі вынеслі яго на руках.

Пасля году Пушкіна судзілі ў Мінску за зачыненымі дзвярыма. На паседжанні 25 сакавіка ён на знак пратэсту парэзаў сабе жывот. За гэта на трынаццаць дзён трапіў у карцэр. Яму прапанавалі напісаць прашэнне аб памілаванні, але ён адмовіўся.

Алеся Пушкіна беларускія праваабаронцы прызналі палітвязнем.