17 красавіка ў Беларусі прайшоў штогадовы суботнік. Такі ўсенародны пачын мае доўгую традыцыю яшчэ з савецкіх часоў, прыдумаў гэта сам Ленін. Падчас сёлетняга рэспубліканскага суботніка ўстановы і прадпрыемствы паслалі сваіх працаўнікоў, каб прыбіраць гарадскія паркі, парадкаваць месцы памяці Вялікай Айчынннай вайны ды іншыя гістарычна-культурныя каштоўнасці.
Удзельнікі пачыну палову заробленых у гэты дзень грошай перадалі на змаганне з COVID-19, а другую палову ў абласныя бюджэты. Суботнік нібыта быў добраахвотны, але хто не хацеў прыняць у ім удзелу, павінен быў унесці ўплату адпаведнай велічыні.
Як кожны год у суботу 17 красавіка на грамадскі пачын выйшлі працоўныя калектывы, а граблі і венікі ў рукі ўзялі нават высокія рангам чыноўнікі. Паколькі 2021 г. аб’яўлены ў Беларусі як Год малой айчыны, Аляксандр Лукашэнка ў гэты дзень разам з трыма сынамі садзіў дрэвы на ўскраю Дняпра на сваёй малой радзіме – у пасёлку Аляксандрыя ў Магілёўскай вобласці (на здымку). Тут штогод адбываецца Ноч Купалы, якая збірае заўсёды шмат удзельнікаў. Ганаровым госцем часта з’яўляецца і кіраўнік дзяржавы. Яго прэсавая служба ў камунікаце з суботніка выказала спадзяванне, што рэзультаты акцыі „напэўна парадуюць усіх гасцей летняга фестывалю”.
