Без рэха астаўся акрыты ліст-заклік Дарыюша Жукоўскага, прыхільніка беларускай справы родам з Гарадка (пражывае ён пад Варшавай), каб хаця б адной бібліятэцы на Падляшшы прысвоіць імя Сакрата Яновіча. Такую заяву разаслаў ён самаўрадам 14 кастрычніка, у Дзень настаўніка. Гмінным уладам у Крынках, Гарадка і іншых мясцовасцей прапанаваў ён ушанаваць вядомага пісьменніка, які памёр у 2013 г., яшчэ ў назвах вуліц ці скверыкаў.

Дарыюш Жукоўскі не першы раз выступае з такой ініцыятывай. Некалькі гадоў таму напісаў войту і гміннай радзе ў Гарадку ліст, у якім звярнуўся з просьбай-прапановай імя Сакрата Яновіча прысвоіць гарадоцкай бібліятэцы. Паклікаўся на тое, што гэта быў „człowiek dużego formatu, wybitny polski Białorusin, piszący po białorusku i polsku” і меў цесныя сувязі з Гарадоччынай, а ў школьныя гады нейкі час жыў нават у сваякоў ў Валілах-Станцыі, скуль ездзіў цягніком штодзень у тэхнікум у Беластоку.

Гарадоцкім уладам няёмка аднак было разглядаць такую прапанову, паколькі імя Сакрата Яновіча пакуль не ўшанаванае нават у яго родных Крынках. Праўда, на пахаванні пісьменніка тадышні крынскі бурмістр Багуслаў Панасюк журналістам сказаў, што імем Сакрата Яновіча добра было б назваць парк, які ў самім цэнтры мястэчка. Пасля аднак ніхто ў Крынках пра гэта нават і не ўспомніў. Між іншым таму, што над вялікім імем Сакрата Яовіча звісае цень яго даўняга супрацоўніцтва з польскй службай бяспекі. Гэта не ёсць ажно вялікай перашкодай, таму мабыць такая прапанова стане яшчэ на павестку дня. Грамадству перш трэба аднак растлумачыць складанасці жыцця Яновіча і яго заслугі для культуры і літаратуры, якія ўсё поўнасцю апраўдваюць.

Юрка Хмялеўскі