4 лістапада ў Севастопалі на анексаваным Расіяй Крыме адзначаўся Дзень народнага адзінства. Там быў расійскі прэзідэнт Уладзімір Пуцін. Напярэдадні ён зацвердзіў дамову Расіі і Беларусі аб паглыбленні інтэграцыі абедзвюх дзяржаў. З Крыму падключыўся да відэаканферэнцыі, у рамках якой адбывалася паседжанне вышэйшага дзяржаўнага савету Саюзнай дзяржавы Расіі і Беларусі. Галоўным яго пунктам было падпісанне Аляксандрам Лукашэнкам таго ж дакумента, які прадугледжвае 28 інтэграцыйных праграм.
Паводле самых радыкальных ацэнак гэта прывядзе да страты сувернітэту Беларусі і ўвойдзе яна ў склад Расіі. Невыпадкова на падпісанне ключавой дамовы быў абраны расійскі Дзень народнага адзінства. Аднак змест зацверджаных тых жа „28-мі саюзных праграм” да публічнага ведама пакуль не пададзены.
Аляксандр Лукашэнка толькі сказаў, што рэалізацыя інтэграцыйнага пакету прынясе Беларусі рост валавога ўнутранага прадукту сама менш на 1 млд долараў, не лічачы дадатковых фінансавых прыбыткаў з адкрыцця расійскага рынку для беларускіх тавараў. Выказаў ён спадзяванне, што падпісаная дамова ў практыцы больш зінтэгруе не толькі дзяржаўныя органы і ўстановы, але таксама беларускіх грамадзян з расійскімі. Дзеля гэтага прапанаваў стварэнне „магутнага саюзнага медыйнага канцэрну”.
Два тыдні пазней расійскі карэспандэнт BBC у інтэрв’ю з Лукашэнкам спытаў яго, ці прадбачваецца, што Беларусь і Расія будзе мець аднаго супольнага прэзідэнта. Той, аднак, катэгарычна запярэчыў.
Як ні круці выглядае, што частку свайго сувернітэту Беларусь аднак страціць. Пытанне толькі, як вялікую.
