Такое пытанне напярэдадні Новага года наш карэспандэнт задаў беларускім палітыкам Паўлу Севярынцу, Міколу Статкевічу, Уладзіміру Някляеву і Віталю Рымашэўскаму. Вось што адказалі палітыкі „Сzasopisu”.
Павел Севярынец:
– Найперш чакаю, што ў 2020 годзе Беларусь застанецца незалежнай. Што для гэтага трэба зрабіць? Беларусам застаўся толькі адзін шлях – шлях малітвы і выхаду на Плошчу. Спадзяюся, народ прачнецца і не дасць прадаць краіну па частках ды „дарожных мапах”. А паколькі кіраўнік рэжыму, Алясандр Лукашэнка, сам прывёў Беларусь у гэтую пастку – хацелася б, каб і ён у 2020 годзе сышоў, і ў Беларусі быў бы новы прэзідэнт. Чакаю, што і падчас амерыканскіх прэзідэнцкіх выбараў левыя пракамуністычныя сілы не захопяць крэпасць вольнага свету. Для сябе – чакаю выхаду трох кнігаў – „Беларусалім. Сэрца святла”, „Ісус Хрыстос гаворыць па-беларуску” і „Алесь Чаркашын”. І малюся за дабраславенне для сваёй сям’і.
Мікола Статкевіч:
– Новага прэзідэнта Беларусі. А таксама адзінства апазіцыі, грамадзянскай супольнасці і ўсіх неабыякавых беларусаў у змаганні за лепшую долю для сябе і сваёй краіны. Будзе адзінства – будзе і новы прэзідэнт!
Віталь Рымашэўскі:
– Чакаю ад новага 2020 года вызвалення Беларусі ад дыктатуры і захавання незалежнасці нашай краіны – Рэспублікі Беларусь.
Уладзімір Някляеў:
– Чакаю канца лукашызму.
Апытваў
Сяргей Чыгрын
