24 студзеня прэзідэнт Аляксандр Лукашэнка наведаў з рабочай паездкай Шклоўскі раён у Магілёўскай вобласці, сваю малую радзіму. Падчас сустрэчы з працоўным калектывам завода газетнай паперы ў Шклове як звычайна падчас такіх „гаспадарскіх” візітаў павучаў, наказваў і грымеў у справах прадпрыемства ды бягучай палітыкі дзяржавы.

– Калі ты вырабляеш табурэтку, – крычаў Лукашэнка на дырэктара завода, – імпартнай табурэткі ў краіне быць не павінна. – Так аднёсся да лішніх імпартных пакупак. Абурыўся таксама паводзінамі чэшскага інвестара, які не стрымаў дамовы, не інвестуючы ў абсталяванне для вырабу дэкаратыўнай паперы. Дырэктар запэўніў, што гэта будзе рэалізаванае. – Адказваеце за гэта „галавой”, разам з міністрам! – грымеў Лукашэнка.

Шмат увагі кіраўнік дзяржавы прысвяціў сваім перагаворам з Уладзімірам Пуціным па паглыбленню інтэграцыі Беларусі з Расіяй. Прыгадаў словы расійскага прэзідэнта, які яму сказаў: „Хочаце мець такія цэны на газ як у нас –  уваходзьце ў склад Расіі”.

– Такога не можа быць, – нервова адказаў Лукашэнка. – Я не хачу быць апошнім прэзідэнтам Беларусі. Ганарова быць першым, але апошнім быць не хачу. У нас ёсць свая краіна, мы – суверэнныя і незалежныя. Мы сваім розумам і рукамі будуем сваю краіну. Я хачу, каб нашы дзеці жылі на гэтым кавалку зямлі ў міры і згодзе.

Пры тым Аляксандр Лукашэнка падкрэсліў, што беларусам расіяне не чужыя. – Гэта нашы людзі, – сказаў. – Праўда, ад іх мала што залежыць цяпер, – дадаў.

Фота  – кадр з тэлеканала CTV.by