Так як у мінулых гадах Аб’яднанне АБ-БА з Беластока сарганізавала летнік „Я нарадзіўся тут” для дзяцей і моладзі, што вывучаюць беларускую мову. Малодшая група адпачывала з 15 па 19 чэрвеня ў аграсядзібе „Бора-Здруй” ў гміне Нараўка. Старэйшыя вучні правялі летнік з 27 чэрвеня па 2 ліпеня ў Мельніку. Пад наглядам настаўніцы Аліны Ваўранюк з сябрамі ўдзельнікі займаліся вышыванкамі, выцінанкамі, спявалі, чыталі, наведвалі ваколіцу і добра гулялі. Са старэйшай групай сустрэліся мастачка Маргарыта Дмітрук і Дарафей Фіёнік з Музея малой бацькаўшчыны ў Студзіводах.

У канцы жніўня ў аграсядзібе „Бора-Здруй” прайшоў таксама тыднёвы летнік для вучняў беларускай анлайн-школы ў Нямеччыне. Адпачывала на ім амаль сорак дзяцей з пяці краін. Наведалі яны таксама Беласток, дзе пазнаёміліся з месцамі звязанымі з беларускай культурай і вядомымі беларусамі.