19 верасня ў беластоцкім парку Плянты Беларускае грамадска-культурнае таварыства сарганізавала XXVII Фестываль польскай і беларускай песні „Беласток-Гродна”. З увагі на вядомыя акалічнасці ўпершыню не быў ён міжнародным.Такое мерапрыемства запачаткаванае было ў 1993 г. і арганізаванае кожны год БГКТ супольна з Саюзам палякаў Беларусі. Ідэя такая, што фестываль адбываецца напераменна ў Беластоку і Гродне, а на сцэне выступаюць калектывы, якія прадстаўляюць нацыянальныя меншасці ў сваіх краінах – польскую ў Беларусі і беларускую ў Польшчы.

Арганізацыі такога фестывалю ў наступных гадах не спрыялі палітычныя падзеі ў Рэспубліцы Беларусь, асабліва пасля расколу ў Саюзе палякаў Беларусі ў 2005 г. БГКТ працягвала супрацу, але ўжо з праўладнай арганізацыяй, якой Польшча не прызнавала, падтрымліваючы Анжаліку Борыс і яе незарэгістраваныя структуры. Таму многія гады польскае Міністэрства ўнутраных спраў і адміністрацыі адмаўляла ў датацыі для гэтага мерапрыемства. БГКТ арганізавала яго за грошы Маршалкоўскай управы Падляшскага ваяводства ды Цэнтра культуры Беларусі пры пасольстве ў Варшаве.

У гэтым годзе на правядзенне фестывалю „Беласток-Гродна” міністэрства датацыю ўжо прызнала. Паколькі аднак палякі з Беларусі не маглі прыехаць, да ўдзелу былі запрошаны польскія калектывы з Польшчы, а беларускія калектывы з Падляшша выконвалі таксама песні на польскай мове.

З увагі на дажджлівае надвор’е на фестываль не прыйшло зашмат публікі. Але і так, як арганізатары напісалі на сваёй старонцы ў фейсбуку – для каля дваццаці калектываў з Падляшша, як прадстаўнікоў беларускай меншасці сёлетні фестываль „стаў магчымасцю падтрымаць палякаў Беларусі”. „Беларусы Падляшша цэняць тыя цёплыя стасункі, якія маюць з сваімі ўсходнімі суседзямі палякамі, – чытаем у допісе. Таму, што тутэйшыя беларусы, як і палякі на той бок мяжы, вельмі добра разумеюць, як важна быць сабой і заяўляць пра сябе, каб твой голас і тваю мову чулі там, дзе ты жывеш, – на зямлі, на якой спрадвеку жылі твае продкі”.

Пасля скандалу на пачатку чэрвеня падчас Свята беларускай культуры ў Беластоку падчас фестывалю „Беласток-Гродна”, як і ўсіх ладжаных БГКТ летніх фэстаў у рэгіёне, не былі ўжо прысутныя беларускія дыпламаты ні з генконсольства ў Беластоку, ні з пасольства ў Варшаве.