8 лістапада ў Беларускім хабе „Новая зямля” ў Беластоку адбыўся арганізацыйны сход ў справе аховы магіл беларускіх дзеячоў на праваслаўных могілках Усіх святых у Беластоку. З такой ініцыятывай выступіў краязнаўца Аляксей Трубкін. Паволе яго апекі асабліва патрабуюць магілы кампазітара і дырыжора Кастуся Кіслага (1898-1980)б грамадска-палітычнага дзеяча, публіцыста і педагога Міколы Чанрецкага, грамадскіх заходнебеларускіх дзеячоў Лявона Богуша (1909-1957) і Сяргея Богуша (1907-1942). 

Згодна з рэгламентам адміністрацыі могілак за іх трэба кожныя дваццаць гадоў уносіць адпаведную плату. Інакш будуць ліквідаваны і на іх месцы можна будзе хаваць іншых людзей. Менавіта, каб да гэтага не дапусціць – паколькі няма ўжо сваякоў, якія гэтага пільнавалі – будзе абвешчаны грашовы збор пад эгідай Беларускага гістарычнага таварыства. Яго старшыня праф. Алег Латышонак выказаў задавальненне, што беларусы якія прыехалі ў Беласток і сталі жыхарамі нашага горада, якраз гэтым цікавяцца.