25-29 верасня ў аграсядзібе Бора-Здруй у Новым Ляўкове прайшлі 34-ыя „Сустрэчы „Зоркі”. Гэта журналісцкія майстар-класы для вучняў пачатковых школ на Беласточчыне, што вывучаюць беларускую мову. Ладзіць іх з 1995 г. штотыднёвік „Ніва”, у якім з самога пачатку – з 1956 г. – ёсць дадатак „Зорка” для школьнікаў. Ужо дваццаць восем гадоў рэдагуе яго Ганна Кандрацюк-Свярубская, якая прыдумала і арганізуе такія сустрэчы.

Сёлетнія майстар-класы адбыліся пасля двухгадовага перапынку з прычыны пандэміі. Дзеткі з ахвотай вучыліся пісаць карэспандэнцкія допісы і складалі сваю газетку. Апрача журналісцкіх заняткаў мелі шмат сустрэчаў з цікавымі асобамі. Міра Лукша чытала ім свае вершы і расказвала як узнікае яе паэзія. Адбылі таксама віртуальнае падарожжа ў Іспанію з журналістам Польскага Радыё Беласток, Міхалам Сцепанюком. Фатограф Юры Раецкі прэзентаваў здымкі людзей і краявідаў Падляшша. З дзеткамі сустрэўся таксама вядомы беларускі пісьменнік Уладзімір Арлоў, які зачытаў фрагмент сваёй кнігі „Адкуль наш род”. Галоўны рэдактар „Нівы” Яўген Вапа прывёз даўнія падшыўкі штотыднёвіка і паказаў вучням як выглядала„Зорка” з дзяцінства іхніх бабуляў і дзядуляў.

Удзельнікі майстар-класаў адбылі таксама экскурсію ў Белавежскую пушчу.

Фота Радыё Рацыя