Урачыстыя мерапрыемствы, прысвечаныя 162-й гадавіне выбуху Студзеньскага паўстання, прайшлі 22 студзеня ў Харошчы пад Беластокам. У гэтым годзе ўдзел ва ўрачыстасцях прынялі беларускія аматары гістарычнай рэканструкцыі.

Афіцыйныя ўрачыстасці распачаліся а 18.00 у харошчанскім касцёле св. Яна Хрысціцеля і св. Сцяпана Пакутніка. Пасля імшы ўдзельнікі ўсклалі кветкі і запалілі знічы ля помніка паўстанцам на вуліцы Застава. Далейшая частка ўрачыстасцяў адбылася на Месцы нацянальнай памяці „Шыбеніца” на вуліцы Крушэўскай у Харошчы. Пасля цырымоніі для ўсіх удзельнікаў было арганізавана традыцыйнае інтэграцыйнае вогнішча.

Акрамя прадстаўнікоў адміністрацыі, войска, пагранічнай і пажарнай ахраны, ўдзел ва ўрачыстацях прынялі рэканструктары з клуба „Invictus 1863”.

Як адзначыла ўдзельніца і адна з арганізатараў клюбу Кацярына Ваданосава, беларускія рэканструктары былі ўпершыню запрошаны да ўдзелу ў мерапрыемствах. У мінулым годзе прадстаўнікі клубу ў гадавіну паўстання самастойна ездзілі ў Хорашч, а таксама ў Мастаўляны – вёску, дзе нарадзіўся адзін з яго кіраўнікоў, Кастусь Каліноўскі.