Далёка не ўсе ўкраінцы ведаюць, што герб Пагоня і бел-чырвона-белы сцяг – сімвалы дэмакратычнай Беларусі і што Лукашэнка іх ненавідзіць. Сведчыць пра тое нядаўняе прыкрае здарэнне ў Кіеве, калі невядомыя вандалы пашкодзілі мемарыял беларускім добраахвотнікам, якія загінулі за свабоду Украіны на вайне з Расіяй. Помнік знаходзіцца на сцяне будынку Каледжа мастацтваў і дызайну ў Кіеве. Нацыянальныя гістарычныя сімвалы Беларусі палічылі яны лукашэнкаўскімі. Люба Хмелевська – дырэктар гэтай установы, у якой навучаюцца 1,5 тыс. студэнтаў, распавяла пра здарэнне журналісту Радыё Рацыя. Яна сказала, што ад нейкага часу пачала атрымліваць званкі з абурэннем і патрабаваннем, каб беларускія сімвалы са сцяны будынку былі зняты. Калі гэта не адбудзецца, пагражалі што замінуюць і падарвуць гэты помнік. Аднойчы каля яго паявіўся пакецік з невядомым змесцівам. Кіраўніцтва каледжу вымушана была выклікаць паліцыю і сапёраў.

Пасля невядомыя вандалы вырашылі зняць са сцены шыльдачку з надпісам „Жыве Беларусь”. Гэта ім цалкам не ўдалося, бо толькі з аднаго боку змаглі адкруціць шрубкі. Пахіленую шыльду тады дырэкцыя каледжу загадала зняць, каб перахаваць яе да часу, калі гэта ўсё высветліцца. Дырэктарка запэўніла ўсіх, што яна з вялікай павагай ставіцца да беларускіх добраахвотнікаў, якія за Украіну аддалі сваё жыццё, ганарыцца імі. Але вандалы палічылі Пагоню і бел-чырвона-белыя колеры лукашэнкаўскімі сімваламі. 

Пасля здарэння ў каледж пачалі прыходзіць лісты ад беларускіх арганізацый з патрабаваннем, каб мемарыял назад усталяваць на сцяне гэтага будынку. Дырэктарка чакае цяпер дазволу ад міністэрства адукацыі.