У Нараўчанскай гміне Гайнаўскага павета штомесячнік „Часопіс” чытаюць. Езджу я з ім да жыхароў тутэйшых вёсак больш дзесяці гадоў. Я гмінны радны і даволі часта іх наведваю, на працягу гэтых гадоў з многімі пазнаёміўся. А гэта важна пры пастаянных кантактах з людзьмі. Пра некаторых чытачоў „Часопіса” я ўжо пісаў і думаю, што так будзе далей. Зацікавіў „Часопісам” жыхароў сама менш дваццаці вёсак у Нараўчанскай і Міхалоўскай гмінах. У суседняй з Нараўчанскай гміне беларускі штомесячнік пачалі чытаць перш–наперш члены актыўнага Гуртка вясковых гаспадынь у Бандарах, а да яго належаць жанчыны з Рыбакоў і Юшкавага Груда, Ірэна Харкевіч ураджэнка Новай Волі Міхалоўскай гміны (яе дзявочае прозвішча Мінько). Яна выйшла замуж у Новае Ляўкова і тут жыве з мужам Яўгенам. Спадарыня Ірэна вучылася ў Пачатковай школе ў Новай Волі і Малочным тэхнікуме ў Беластоку. Пасля заканчэння вучобы ў тэхнікуме працавала на Малочным заводзе ў Міхалове. Калі выйшла замуж, працавала на Керамічнай фабрыцы ў Старым Ляўкове.
Спадарыня Ірэна беларускай мове вучылася ў пачатковай школе і сваёй роднай мовай даражыць. Чытае „Часопіс” і беларускі штотыднёвік „Ніву”. У Новым Ляўкове і суседніх вёсках размаўляюць па–беларуску на штодзень. Свая мова найлепшая. Вышэйназваныя беларускія газеты нам неабходныя. Калі будзем іх чытаць — не забудзем свае мовы. Будзем на ёй гаварыць і пісаць
Цяпер сужонства Харкевічаў на заслужанай пенсіі. Вядуць акуратна гаспадарку і даволі вялікую пасеку. У іх самы лепшы мёд. Прыязджайце і купляйце.
Тэкст і фота Янкі Целушэцкага
