13 лістапада ў Падляшскай кніжніцы ў Беластоку госцяй чарговай „Літаратурнай серады” была вядомая польская пісьменніца родам з Гайнаўкі – Катажына Бонда. Падчас сустрэчы сказала, што найлепшай сваёй кнігай лічыць раман „Акулярнік”, у якім апісала забойствы мірных праваслаўных беларусаў на Падляшшы байцамі Рамуальда Райса псеўданім „Буры”. Прызналася, што сярод усіх кніг над гэтай ёй было працаваць найбольш цяжка. Аўтарка доўгі час збірала да яе матэрыялы, запісывала ўспаміны, праводзіла кансультацыі з экспертамі. Людзі, з якімі тады гаварыла, не верылі, што яна гэту кнігу напіша і што будзе выдадзена. Нават выдавец яе папярэджваў, што такога раману выдаваць не будзе. Але яна напісала і выдала яго, бо палічыла гэта сваёй павіннасцю.

Карэспандэнту Радыё Рацыя Катажына Бонда расказала, што ў маладосці спявала з бацькамі ў царкоўным хоры і паўсюль падкрэслівае свае беларускія карані. Сказала, што гаварыць па-беларуску ёй ужо цяжка, але чытае без праблем.

Падчас сустрэчы з ёю было шмат людзей з Гайнаўкі. Адна жанчына спытала пісьменніцу, чаму яна не бывае ў беларускім ліцэі, у якім вучылася. – Каб запрасілі, абавязкова прыехала б – сказала „каралева польскага дэтэктыву”.