За амаль два мільёны еўра з трансгранічнай праграмы Еўразвязу гэтыя памежныя гарады рэалізуюць праект „Шлях Тызенгаўза”. У яго рамках у абодвух гарадах праводзяцца рамонты па адной камяніцы, а неўзабаве злучыць іх яшчэ турыстычны роварны шлях.

У Саколцы рэстаўруюць камяніцу з канца XVIII cт. па вуліцы Пілсудскага 1, у якім размесціцца між іншым цэнтр турыстычнай інфармацыі. А ў Гродне рэстаўруецца былы будынак гістарычнага архіва на плошчы Тызенгаўза. У ім з’явіцца таксама кавярня. Будзе называцца „Ева”, у гонар бурмістра Саколкі Евы Кулікоўскай.

Якасная роварная сцежка будзе пабудаваная ўздоўж возера Юбілейнае ў Гродне і з беларускага боку працягнецца з Гродна да Брузгоў, перасячэ беларуска-польскую мяжу ў Кузьніцы і давядзе ў самую Саколку.

Назва праекту спасылаецца на Антонія Тызенгаўза, славутага рэфарматара з другой паловы XVIII ст. Быў ён тады падскарбім Гродзенскай эканоміі. Перабудаваў на еўрапейскі манеўр сёлы і мястэчкі на цяперашняй Сакольшчыне і Гарадзеншчыне, пабудаваў каля пяцідзесяці фабрык-мануфактур. Тады перабудаваны быў між іншым цэнтр Саколкі і недалёкія Крынкі вакол славутай кругавой вулічнай развязкі – «ронда». Каб ушанаваць памяць пра Тызенгаўза, у Саколцы і Гродне з’явяцца лавачкі з яго постаццю.