Гэта быў першы ў гісторыі праваслаўнай Царквы на Падляшшы такі пратэст. Вернікі з парафіі ў Крынках не пагадзіліся з рашэнннем архіепіскапа беластоцкага і гданьскага Якава, які тутэйшага настаяцеля а. Пятра Харытанюка дэкрэтам устанавіў вікарыем у царкве св. Юрыя ў Беластоку. Да 5 ліпеня збіраліся подпісы пад лістом у гэтай справе да ўладыкі, а перад крынскай царквою з’явілася расцяжка з надпісам „Нічога пра нас без нас” (на здымку). Уладыка аднак свайго рашэння не адмяніў, а згодна з законамі ў Царкве святароў абавязвае поўная паслухмянасць.
Айцец Пётр Харытанюк, якому ўжо 63 гады, праслужыў настаяцелем у Крынках амаль сорак гадоў. Таму перанос цяпер на іншую парафію выклікаў здзіўленне жыхароў усёй гміны, таксама католікаў, якіх цяпер нашмат больш чымсьці праваслаўных. Усе тут былі перакананыя, што а. Пётр нікуды да канца чыннага святарства ўжо згэтуль не выедзе. У апошнюю нядзею ліпеня прыйшлося ім аднак са сваім шматгадовым настаецелем развітацца. Былі кветкі, словы падзякі і… слёзы.
З 1 жніўня новым настаяцелем царквы ў Крынках стаў а. Юсцін Ярашук, які дагэтуль быў вікарыем у Саколцы. Прычын адклікання а. Пятра Харытанюка ўладыка Якаў не выявіў.
