12 ліпеня ў другім туры прэзідэнцкіх выбараў у Польшчы перамог кандыдат кіруючай партыі Права і Справядлівасць, дзейнічаючы прэзідэнт Анджэй Дуда. Ён набраў 51 прац. галасоў, а яго сапернік Рафал Тшаскоўскі з апазіцыйнай Грамадзянскай кааліцыі – 49 прац. На Падляшшы перавага Дуды была большая. Падтрымала яго тут 60 прац. выбаршчыкаў. Надта высокая была яўка – 68,18 прац. у краіне, на Падляшшы крыху меншая – 64,33 прац.

Паколькі падчас восеньскіх парламенцкіх выбараў наша меншасць – беларусы і праваслаўныя – упершыню даволі шматлюдна прагаласавала на ПіС, то цяпер гэтая падтрымка была значна меншай. Рафал Тшаскоўскі выйграў у Беластоку, Гарадку, Міхалове, Супраслі, Бельску, Орлі, Гайнаўцы і ва ўсіх гмінах Гайнаўскага павета. З гэтага відаць, што наша меншасць у значна большай ступені чымсьці палякі хацела змены на вышэйшым пасту ў Польшчы.

Што цікава, царкоўнае Форум меншасцей Падляшша, якое цесна супрацоўнічае з Грамадзянскай платформай, не заклікала, каб галасаваць на Тшаскоўскага. Гэтая арганізацыя вырашыла не даваць падтрымкі ні аднаму, ні другому кандыдату. Але і так было вядома, што праваслаўныя і беларускія выбаршчыкі, пабойваючыся поўнай улады ў руках ПіС, у большасці прагаласуюць супраць Дудзе. Гэтак і сталася. Трэба аднак справядліва заўважыць, што дзейнічаючы прэзідэнт адносіцца да нас вельмі цёпла і з сімпатыяй. Але ён перадусім рэпрэзентант асяроддзя, якое, на жаль, не заўсёды дастаткова нам спрыяе.