Беларускае грамадска-культурнае таварыства ў верасні амаль штотыдзень ладзіла свае мерапрыемствы ў розных мясцовасцях рэгіёну.
4 верасня прайшоў фестываль „Культура без межаў”. Гэтае мерапрыемства, якое служыць шматкультурнасці Падляшша, дагэтуль праводзілася ў Сямятычах. У гэтым годзе ўлады горада спынілі аднак супрацоўніцтва з БГКТ, не даючы згоды на арганізацыю там беларускіх імпрэзаў. Непаразуменне ўзнікла з-за вайны ва Украіне і падтрымкі Расіі з боку лукашэнкаўскай Беларусі. Бурмістр Сямятыч сваю варожасць пашырыў на ні ў чым тут невінаватых беларусаў з Падляшша. Такіх недарэчных асацыяцый не меў войт гміны Мельнік ў Сямятыцкім павеце. Дзякуючы яму сёлетні выпуск фестывалю „Культура без межаў” адбыўся ў Машчоне-Каралеўскай.
Фота з Фейсбука
У наступных тыднях БГКТ сарганізавала яшчэ пяць беларускіх народных фэстаў – у Бельску-Падляшскім, Белавежы, Войшках, Орлі і ў Рагачах каля Мілейчыч. Выступілі там беларускія калектывы з Падляшша. На сцэне ў Машчоне-Каралеўскай і ў Бельску прэзентаваўся таксама вакальны ансамбль беларускай песні „Купалінка” з Клайпеды (Літва). З-за палітычных абставін у мерапрыемствах БГКТ у гэтым годзе не ўдзельнічаюць калектывы з Беларусі, а ў след за тым не запрашаюцца беларускія дыпламаты ў Польшчы.
