3 сакавіка ў судзе Ленінскага раёна Мінска быў абвешчаны прысуд па крымінальнай справе супраць кіраўніцтва праваабарончага цэнтра „Вясна”, якое абвінавацілі ў фінансавых злоўжываннях. Суддзя Марына Запаснік усіх чатырох абвінавачаных прызнала вінаватымі ў фінансаванні пратэстаў у 2020 г. і ў „кантрабандзе наяўных грашовых сродкаў арганізаванай групай”.

Старшыня „Вясны”, нядаўні лаўрэат Нобелеўскай прэміі міру Алесь Бяляцкі атрымаў 10 гадоў калоніі ва ўмовах узмоцненага рэжыму. Яго намеснік Валянцін Стэфановіч – 9 гадоў такой калоніі, а юрыст Уладзімір Лабковіч – 7. Праваабаронцы Змітру Салаўёву, які знаходзіцца за мяжой, завочна далі 8 гадоў калоніі ўзмоцненага рэжыму. Гэта на два гады менш кожнаму, чымсьці прасіў пракурор Аляксандр Кароль. Кожнаму абвінавачанаму прысудзілі яшчэ штраф памерам 185 тысяч беларускіх рублёў (314,5 тыс. зл). Праваабаронцы могуць яшчэ прысуд абскардзіць.

21 праваабарончая арганізацыя ў свеце выступіла з заявай, каб вызваліць „вясноўцаў” і зняць з іх усе абвінавачанні. За мяжой прайшлі шматлікія акцыі салідарнасці.

Судовы працэс цягнуўся два месяцы. Падчас абвяшчэння прысуду залу запоўнілі маладымі хлопцамі ў цывільным. Верагодна былі гэта курсанты Акадэміі Міністэрства ўнутраных спраў, як гэта неаднойчы рабілася на палітычных працэсах.