5 ліпеня ў амаль стогадовым узросце ў Варшаве памёр Хведар Галёнка (на здымку ў 2022 г.), шматгадовы беларускі дзеяч. „Дзейнасць на карысць беларускага грамадства ў Польшчы, нават у самыя цяжкія часы, была галоўным зместам Яго жыцця”, – напісала дачка Ірына ў імэйлу нашай рэдакцыі. 

Хведар Галёнка быў родам з Гайнаўшчыны, нарадзіўся ў вёсцы Пасечнікі-Вялікія. Скончыў лепшы польскі эканамічны ўніверсітэт – Галоўную школу планавання і статыстыкі ў Варшаве, дзе астаўся жыць. Працавў на многіх міжнародных будовах, таксама ў дыпламатыі. З жонкай Любай пражылі разам 66 гадоў.

Пачаўшы жыць у Варшаве Хведар Галёнка адразу актыўна ўключыўся ў дзейнасць толькі што пакліканага Беларускага грамадска-культурнага таварыства. Яго добра ведалі і паважалі сябры і наведвальнікі легендарнага клуба-сядзібы варшаўскага аддзелу арганізацыі на вуліцы Сенатарскай. Часта з’яўляўся таксама на старонках „Нівы”.

Як адміністратар клуба БГКТ у Варшаве быў прыхільны беларускім студэнтам, якія ў васмідзесятыя гады там сустракаліся, намагаючыся паклікаць Беларускае аб’яднанне студэнтаў, выдавалі свой часопіс „Сустрэчы”. 

Хведар Галёнка яшчэ вядомы быў як адзін з арганізатараў славутых навагодніх баляў паводле праваслаўнага стылю ў Палацы культуры і навукі, на якія прыязджала таксама шмат асоб з Беласточчыны. Пабываць на гэтых балях лічылася чымсьці надта прэстыжным.