29 ліпеня ў Мінску пачаўся судовы працэс у гучнай справе „змовы з мэтай захопу ўлады ў дзяржаве”. Абвінавачаны – публіцыст Аляксандр Фядута, старшыня апазіцыйнай партыі Беларускі народны фронт БНФ Рыгор Кастусёў, юрыст Юрась Зянковіч, яго супрацоўніца Вольга Галубовіч і грамадскі актывіст Дзяніс Краўчук. У справе фігуруе яшчэ пяць асоб, але яны пражываюць за мяжою або збеглі з Беларусі.

У красавіку 2021 г. у Маскве былі арыштаваны Фядута і Зянковіч, а ў Шклове Кастусёў. Тады Аляксандр Лукашэнка заявіў, што былі яны ініцыятарамі замаху на яго жыццё. Забітыя мелі быць таксама яго тры сыны. Акцыю з мэтай дзяржаўнага перавароту нібыта рыхтавалі амерыканскія спецслужбы. Па іх камандзе абвінавачаныя быццам планавалі на 9 мая ваенны пераварот паводле сцэнарыя „каляровых рэвалюцый” з удзелам беларускіх і ўкраінскіх нацыяналістаў. Паводле Лукашэнкі на гэта было выдзелена 10 мільёнаў долараў, з чаго адзін мільён меў атрымаць снайпер, што яго застрэліць.

На думку незалежных палітычных аналітыкаў уся справа была цалкам сфабрыкаваная спецслужбамі. Такі паказны суд быў рэжыму патрэбны, каб апраўдацца перад грамадствам за жорсткае падаўленне пратэстаў, якія ўспыхнулі пасля сфальшавання прэзідэнцкіх выбараў у 2020 г.

Спецслужбы мабыць прымусілі Фядуту, што той на судзе нечакана прызнаў сваю віну.

11 жніўня ў якасці сведкі дапыталі былога апазіцыйнага блогера Рамана Пратасевіча, якога затрымалі ў мінскім аэрапорце ў траўні 2021 г. прымушаючы да прызямлення самалёт на барту якога ляцеў з Афін у Вільню. Пасля пачаў ён супрацоўнічаць з рэжымам Лукашэнкі. Пратасевіч сказаў, што быў варыянт сілавога звяржэння ўлады ў Беларусі. „Ніякага іншага спосабу не было, бо маршы і шэсці праваліліся”, – сказаў ён. Дабавіў, што ў гэтай справе планавалася сустрэча Ціханоўскай у Маскве, Стамбуле або якім-небудзь іншым горадзе ў Еўропе.