У Палату прадстаўнікоў паступіў законапраект пра пазбаўленне беларускага грамадзянства асобаў, якія знаходзяцца за межамі Беларусі. Гэта тычыцца тых, што рашэннем суду Рэспублікі Беларусь прылічаны да экстрэмісцкай дзейнасці. Такое рашэнне мае прымаць дыктатар па прапанове камісіі па справах грамадзянства. Тыя, што страцяць грамадзянства, не змогуць уехаць у краіну на працягу да 30-ці гадоў.
З’явіліся таксама чуткі пра амністыю. На пачатку верасня генеральны пракурор Андрэй Швед паведаміў, што пад яе трапіць не менш за 8 тыс. чалавек. Амністыя мелася быць прымеркаваная да „Дня народнага адзінства”, які адзначаецца 17 верасня ва ўгодкі ўступлення Чырвонай арміі у 1939 г. у Заходнюю Беларусь. Сярод амніставаных маглі б быць і асуджаныя паводле палітычных артыкулаў. Але з умовай, што яны павінны „пакаяцца” і „стаць на шлях выпраўлення”, ды цалкам „загладзіць сваю віну”.
Паводле назіральнікаў планаваная амністыя вынікае з краху Расіі ў плане захопу Украіны. Стала відавочна, што фінансавых крэдытаў для Мінска і інвестыцый у ранейшым вялікім аб’ёме ўжо не будзе. Таму абвешчанне амністыі было б уступкам у бок Захаду. Аднак пакуль Лукашэнка на такі крок не пайшоў.
