З-за каронавіруса запланаваныя на вясну беларускія мерапрыемствы на Падляшшы адбудуцца пазней. Беларускае грамадска-культурнае таварыства адклала правядзенне дэкламатарскіх і тэатральных конкурсаў для дзяцей і моладзі. 18 сакавіка ў Беластоку і 25-га ў Бельску меліся адбыцца раённыя элімінацыі штогадовага дэкламатарскага конкурсу „Роднае слова”. Звачайна прымае ў ім удзел каля пяцісот школьнікаў. У гэтым годзе конкурс мае адбыцца ўжо 49-ты раз запар. Новыя даты элімінацый пакуль невядомыя. Як сказаў у Радыё Рацыя намеснік  старшыні ГП БГКТ Васіль Сегень, адбудуцца яны, калі сітуацыя выправіцца.

З-за каронавіруса ў гэтым годзе не было таксама святкавання 25 Сакавіка. Дня волі, ладжанага нашымі арганізацыямі згуртаванымі ў Беларускім саюзе ў Рэчыпаспалітай, нельга было правесці з увагі на абмежаванні, якія ўвялі польскія ўлады, забараняючы наогул грамадскія і культурніцкія сустрэчы і мерапрыемствы.

Дзяржаўныя эпідэміялагічныя органы зарэкамендавалі таксама, каб у набажэнствах у касцёлах і цэрквах адначасова прымала ўдзел не болей пяцьдзесяці вернікаў, захоўваючы пры тым адпаведную дыстанцыю чалавек ад чалавека. Тымчасам на нядзельняй літургіі 22 сакавіка ў царкве св. Юрыя ў Беластоку прысутнічала больш за 70 вернікаў. Пра парушэнне каранціну хтосьці паведаміў паліцыю. Спісала яна толькі рапарт, без прымянення законных паслядоўнасцей.

З увагі на эпідэміялагічную сітуацыю ў краіне вядома ўжо, што не адбудзецца ў вызначаным раней тэрміне 11-16 траўня сёлетні фестываль „Гайнаўскія дні царкоўнай музыкі”. Арганізатары перанеслі яго на 14-19 верасня. Пакуль невядома, ці падобнае рашэнне прыме Фонд Царкоўная музыка з Гайнаўкі, які ў Беластоку праводзіць штогод блізнячы фестываль, неўзабаве пасля гайнаўскага.

Міністэрства ўнутраных спраў і арганізацыі, якое з’яўляецца галоўным спонсарам большасці беларускіх мерапрыемстваў, заракамендавала перанесці на пазней цяперашнія імпрэзы або наогул адступіць у гэтых выпадках ад дамовы.