Помнік ахвяр „Бурага” ў Залешанах у Кляшчэлеўскай гміне быў пастаўлены ў 1965 г. З таго часу ён раскрышыўся, а мемарыяльная дошка саржавела. Да таго ж у надпісе была дапушчана памылка пра дату злачынства і лік ахвяр. Спатрэбіўся рамонт. У мінулым годзе бургамістр Кляшчэль Аляксандр Сяліцкі звярнуўся ў Ваяводскую ўправу ў Беластоку, каб на гэта выдзелілі там грошы – некалькі тысяч злотых – з фонду, з якога дзяржава рэстаўрыруе мемарыялы ў месцах памяці мартыралогіі часоў ІІ сусветнай вайны. Ваявода гміне аднак сродкаў не прызнаў. Тады Сяліцкі вырашыў прыняць дапамогу ад арганізацыі „Курск”, якая ў асноўным за грошы польскіх і расійскіх ахвярадаўцаў займаецца ва ўсёй Польшчы аховай могілак і мемарыялаў Чырвонай арміі ды „барацьбой супраць русафобіі”.

Рэстаўрацыйныя працы пачаліся познай восенню, але паколькі не было зімы, удалося іх закончыць так як планавалася – да канца студзеня, перад гадавінай злачынства „Бурага”, хаця дата і іншыя памылкі на адноўленай дошцы так і засталіся.

Гэта можна і трэба было зрабіць інакш. Хапіла б абвесціць збор грошай у інтэрнэце. Напэўна на такую векапомную мэту хутка знайшліся б ахвярадаўцы. А так абсалютна нефартунна нашы далі аргумент польскім нацыяналістам, якія намагаюцца апраўдваць „Бурага” ў злачынствах на беларусах, выдумляючы заслугі ахвяр для стваранага па вайне камуністычнага парадку ў Польшчы, з якім быццам толькі выключна тыя „выклятыя жаўнеры” ваявалі. Ну бо калі зруйнаваным помнікам ў Залешанах заклапацілася цяпер арганізацыя, якую папракаюць – няважна ці слушна, ці не – у сімпатыях да саветаў, то гэта ўскладняе і так надта няпростую атмасферу вакол тадышніх трагічных здарэнняў.

Тое, што польская арганізацыя Курск парадкуе і аднаўляе магілы савецкіх салдатаў, якія згінулі ад нямецка-фашыскіх захопнікаў, гэта проста гуманнае і думаю нічога дрэннага ў гэтым няма. Але помнік у Залешанах пастаўлены ў памяць ахвяр, якія згінулі ад іншых злачынцаў. Трэба і можна было адрамантаваць яго іншым спосабам. Хтосьці тут проста не думае.

Фота: facebook.com/stkursk