Як беларусы на Падляшшы можам ганарыцца, што адзін з нашых, вядомы мастак прафесар Лявон Тарасэвіч, стварыў вялікую манументальную працу, якая ў кастрычніку будзе красавацца ў польскім павілоне прэстыжнай Сусветнай выставы EXPO ў Дубаі. Размаляваў ён сваю найбольшую дагэтуль карціну (3,4 на 13,5 метраў) для падляшскай там прэзентацыі Xylopolis. З увагі на вялікія памеры паўстала яна не ў яго майстэрні ў Валілах каля Гарадка, але на фабрыцы мадульных дамоў Unihouse ў Бельску, дзе летам мастак працаваў над ёю ажно два тыдні.

Абстрактная карціна Тарасэвіча ёсць мастацкай выявай лесу ў розныя поры года – іх сінтэзам са святлом.

Пасля адной з выставаў, якая ў канцы ХІХ стагоддзя запачаткавала EXPO, засталася славутая Эйфелева вежа ў Парыжы. – Калі свет гэта памятае, то чаму ў такі спосаб не можа быць захаваная творчасць праф. Тарасэвіча, – сказала падчас прэзентацыі яго працы на бельскім прадпрыемстве ў палове жніўня намесніца генеральнага камісара Польскай секцыі Сусветнай выставы ў Дубаі Моніка Дылёнг-Саюр.