Сілавікі не перастаюць пераследаваць людзей за тое, што ў 2020 г. выходзілі на акцыі пратэсту. Вышукваюць інфармацыі з розных крыніц, але перадусім працуюць на шматлікіх відэа, якія тады наздымалі. Гэта патрабуе часу, каб у такой масе кагосьці ідэнтыфікаваць. Тым не менш тое ўвесь час робіцца.
Міліцыянты таксама не спыняюць лавіць тых, хто заходзіць на незалежныя сайты („экстрэмісцкія”). Уважліва чытаюць змешчаны там каментары, таксама ў Фейсбуку, Інстаграме ды іншых сацсетках. Пасля прыходзяць да гэтых людзей дадому і ў іхніх тэлефонах шукаюць нейкага відэа ці здымкаў, якіх не выдалілі яны са свайго архіву.
Праваабарончы цэнтр „Вясна” ўвесь час інфармуе пра затрыманне сілавікамі ці суды чарговых „экстрэмістаў”. 13 верасня Мінскі гарадскі суд прыгаварыў да чатырох гадоў калоніі агульнага рэжыму вядомага таксама на Беласточчыне гісторыка Ігара Мельнікава (на здымку), які даследуе перыяд знаходжання Заходняй Беларусі ў межах Польшчы ў 1921-1939 гадах і Другой сусветай вайны. Пра затрыманне 44-гадавога ўраджнца Бабруйска стала вядома ў ліпені. Падставай было інтэрв’ю ў Еўрапрадыё, якое ён даў у студзені 2022 г., калі знаходзіўся ў Польшчы. Кнігі гісторыка ў жніўні суд прызнаў „экстрэмісцкімі”.
Лукашэнкаўскія прапагандысты заявілі, што на судзе ён поўнасцю прызнаў віну. Прыгавор не ўступіў у сілу паколькі можа быць яшчэ абскарджаны і апратэставаны ў апеляцыйным парадку.
Ігар Мельнікаў праваабаронцамі прызнаны палітвязнем.
У канцы верасня сілавікі правялі чарговую аблаву ў Глыбокім. Затрымалі між іншым краязнаўцу Паўла Лаўрыновіча. У яго дома правялі ператрус і яму надзелі кайданкі. Пра гэта павядоміў Кастусь Шыталь – глыбачанін, які цяпер пражывае ў Беластоку. Напісаў ён у Фейсбуку, што праўдападобна ахвярамі аблавы стала дванаццаць асоб. Забіралі тых, хто выходзіў у Глыбокім на пратэсты ў жніўні 2020 года.
