Пасля аблягчэння каранавірусных абмежаванняў БГКТ пачало арганізаваць свае пастаянныя штогадовыя мерапрыемствы. 8 красавіка ў Бельскім доме культуры ў Бельску-Падляшскім адбыўся фінал дэкламатарскага конкурсу „Роднае слова – 2022”. Беларускае грамадска-культурнае таварыства арганізавала яго ўжо 51-ы раз. Папярэдзілі яго раённыя элімінацыі ў Орлі, Гайнаўцы і Беластоку. Прынялі ў іх удзел як штогод юныя дэкламатары з дзіцячых садкоў і пачатковых школ, у якіх ёсць заняткі па беларускай мове.
У красавіку БГКТ зладзіла таксама конкурс „Беларуская песня для дзяцей і моладзі 2022” і пачало рыхтавацца да сваіх наступных мерапрыемстваў. На травень запланаваныя раённыя адборачныя конкурсы фестывалю беларускай песні, які звычайна ладжаны быў у лютым. Сёлетні выпуск пройдзе пад лозунгам „Беларуская песня2022 – салідарныя з Украінай”. Як кажуць арганізатары, у такі спосаб хочуць яны „выказаць надзею на хуткае заканчэнне страшнай вайны і падкрэсліць, што нашы беларускія сэрцы прагнуць міру”. Цэнтральны агляд адбудзецца 4 чэрвеня ў Гайнаўскім доме культуры, а гала-канцэрт восенню.
