1 кастрычніка ў Дубаі, сталіцы Аб’яднаных Арабскіх Эміратаў, пачалася – з гадавым спазненнем, з увагі на пандэмію – сусветная выстава EXPO 2020. Ёсць там моцны падляшскі акцэнт. У польскім павілоне між іншым можна глядзець прэзентацыю Xylopolis. Падрыхтавала яе Маршалкоўская ўправа Падляшскага ваяводства. Прадстаўляе яна від чыстай эканомікі з выкарыстаннем натуральнай і экалагічнай драўлянай сыравіны.
На адкрыццё паляцела ў Дубай дэлегацыя Падляшскага ваяводства на чале з маршалкам Артурам Касіцкім. У яе складзе быў таксама мастак праф. Лявон Тарасэвіч. Для Xylopolis размаляваў ён манументальнаю карціну памерамі 3,4 на 13,5 метраў. Гэта мастацкая выява лесу ў розныя поры года – іх сінтэз са святлом. Аўтар улетку два тыдні працаваў над ёю на фабрыцы мадульных дамоў Unihouse ў Бельску.
Адным з галоўных пунктаў ўрачыстага адкрыцця польскага павілону на EXPO 2020 была менавіта прэм’ера працы Тарасэвіча. Музычным акцэнтам быў энергетычны канцэрт спявачкі Караліны Ціхай, якая родам з-пад Харошчы, а ў сваім рэпертуары мае таксама песні на беларускай мове. У канцы жніўня мела яна таксама свой канцэрт падчавс Трыялогу ў Крынках.
19 кастрычніка на EXPO 2020 ў Дубаі стартаваў Тыдзень Падляшскага ваяводства. Ізноў у цэнтры ўвагі наведвальнікаў была карціна мастака з Валілаў з прыгожа выдадзеным каталогам „Лявон Тарасэвіч. Expo 2020 Дубай”.
Сусветныя выставы ў сталіцы Аб’яднаных Арабскіх Эміратаў гэта найбольш прэстыжныя падзеі ў свеце для прамоцыі эканамікі, культуры і турызму паасобных краін. EXPO 2020 будзе працаваць шэсць месяцаў. За гэты час, як мяркуюць арганізатары, выставу наведае 18 млн чалавек.
Фота з Фейсбука
