Менск адкрываецца свету. У сталіцы Беларусі актыўна праходзяць вечары розных краін свету. Менчукі ўжо адгулялі на вечарах Швецыі, Расеі, надышла чарга і Польшчы. Фестываль адбыўся 15 чэрвеня ў цэнтры сталіцы. Наведвальнікі маглі паспрабаваць польскія прысмакі, даведацца болей пра турыстычныя мясціны і паслухаць польскую музыку.

Галоўная мэта Дня Польшчы – дапамагчы беларусам наноў адкрыць польскую культуру. Таму арганізатары намагаліся паказаць разнастайнасць і багацце традыцый гэтай краіны, а таксама адлюстраваць Польшчу сучасную.

Польская гісторыя і чэргі

па аўтограф Януша Вішнеўскага

У гэтым годзе Дзень польскай культуры заняў адразу некалькі лакацый беларускай сталіцы: Верхні Горад, дворык каля Музея беларускай конкі, гандлёвы цэнтр Galleria.

У Верхнім горадзе ля Ратушы можна было больш даведацца пра Польшчу і яе знакамітыя мясціны. Там працавалі тэматычныя адукацыйныя пляцоўкі. Напрыклад, была фотавыстава, якая распавядала пра галоўныя турыстычныя мясціны Польшчы: ад Вавеля ў Кракаве да Мазурскіх азёраў.

У розных шапіках можна было ўзяць пачытаць кнігі па-польску: і мастацкія, і нон-фікшн. Ахвотней за ўсё разыходзіліся кнігі па гісторыі Польшчы. Пра польскую сучаснасць можна было даведацца ў гандлёвым цэнтры Galleria Minsk. Там быў арганізаваны інфармацыйны пункт пра гісторыю Польшчы ў Еўрапейскім саюзе. На ім распавядалі пра праграмы, якія рэалізуе Еўрапейскі саюз у краіне-суседцы, а таксама і пра актыўнасці Польшчы ў Беларусі.

Там жа адбылася сустрэча з вядомым польскім пісьменнікам Янушам Вішнеўскім. Сустрэчу са спадаром Янушам мадэравала Валярына Кустава, вядомая беларуская тэлевядучая і паэтка. Пасля сустрэчы можна было ўзяць аўтограф польскага літаратара – і чарга зацягнулася на гадзіну!

Песні, пляскі і кракаўскі Лайконік

Які ж фестываль без музыкі? На фестывалі можна было пачуць канцэрт у гонар беларуска-польскага кампазітара Станіслава Манюшкі, якога 200-годдзе нядаўна святкавалася. У гонар 80-годдзя славутага Чэслава Немана, ураджэнца Шчучыншчыны, выступалі вакальна-інструментальныя ансамблі польскай дыяспары ў Беларусі. Вечаровай разынкай ды кульмінацыяй музычнай праграмы стаў выступ гурту Golden Life.

У дворыку музею беларускай конкі адбывалася вулічнае тэатральнае прадстаўленне. Спектакль «Сэрца Дона Жуана ў агні» – гэта захапляльнае відовішча па матывах гісторыі вядомага каханка.

Разынкай фестывалю Польшчы стала традыцыйнае шэсце Кракаўскага Лайконіка – сымбаля вызвалення Кракава ад захопнікаў. Гэта татарскі вершнік, які ў прыгожым строі (агульная вага – 30 кілаграм!) танчыць і забаўляе гледачоў. Гэты персанаж прайшоўся па гістарычным цэнтры Менску ад галерэі Міхаіла Савіцкага да Ратушы, цалкам апрануты ў свой фальклорны строй, і станчыў для натхнёнага натоўпу.

Амаль што паветра волі

У паветры разліваўся водар традыцыйнай польскай ежы: бігаса, флякаў ды квасу, якія паўсюль прадаваліся ў Верхнім горадзе. Але стварыць вясёлую ды разняволеную атмасферу не атрымалася. Паўсюль можна было пабачыць міліцыянтаў і аўтазакі – адвечных спадарожнікаў беларускіх фестываляў.

Але нягледзячы на гэтыя нязручнасці, наведвальнікі зазначаюць, што свята атрымалася файным. Глеб Сандрас упершыню наведаў Дзень Польшчы ў Менску. Хлапец прызнаецца, што адчувае блізкасць да Польшчы.

– Мае продкі жылі ў Нясвіжы, калі ён быў у складзе Другой Рэчы Паспалітай. Я вучыўся і працаваў у Вроцлаве і Варшаве на працягу пяці гадоў. Трапіў на Дзень Польшчы па запрашэнні майго сябра. Больш за ўсё мне спадабаўся выступ гурту „Гаротніца”, у дадатак я ведаю некаторых чальцоў гэтага гурта. Пакаштаваў і бігас. Ён быў не горшы за польскі, вельмі аўтэнтычны. Нечакана на імпрэзе было шмат турыстаў: з Польшчы, Мексікі, Расеі, Кітаю. Агулам файна, што ў Беларусь зараз прыязджае ўсё болей замежцаў.

Дзень Польшчы дазволіў менчукам дазнацца болей пра краіну-суседку. Надалей у Менску штотыдзень будуць праходзіць культурныя вечары іншых краін: Вялікабрытаніі, Кітаю, Італіі і шмат іншых. І яны будуць не меней каляровымі за польскі.

Аўтарка тэксту і фота: Ксенія Тарасевіч