12 красавіка мінула 60 гадоў ад палёту першага чалавека ў космас. Быў ім Юры Гагарын. Нарадзіўся ён на Смаленшчыне недалёка сённяшняй расійска-беларускай мяжы. Гэтая зямля калісь была ў складзе Вялікага княства Літоўскага.
Як кажуць, Гагарын, калі быў дзіцём, прачытаў вершык класіка беларускай літаратуры Янкі Купалы „Хлопчык і лётчык”. І тады сам захацеў лётаць і так стаў касманаўтам. Калі быў ужо слаўным, аднаго разу пасля сустрэчы з удзелам пісьменнікаў з Мінска, сказаў пры чарцы, што „ён – амаль беларус”.
Варта згадаць, што першая жанчына ў космасе – Валянціна Церашкова, якой споўніліся нядаўна 84 гады, таксама мае беларускае паходжанне. Нарадзілася яна ў сям’і перасяленцаў з Беларусі, а ў дзяцінстве з бацькамі размаўляла па-беларуску.
Першым „стопрацэнтным” беларускім касманаўтам стаў Пётр Клімук. Нарадзіўся ён у вёсцы Камароўка ля самой цяперашняй беларуска-польскай мяжы, недалёка нашага Падляшша. Клімук паляцеў у космас разам з першым і пакуль адзіным польскім касманаўтам, Міраславам Гермашэўскім.
Касманаўтыцы сваё жыццё прысвяціў яшчэ славуты беларус Барыс Кіт, які дажыў ажно 108 гадоў (памёр у 2018 г. у Нямеччыне). Пасля вайны эміграваў ён у ЗША, дзе стаў канструктарам амерыканскай ракетнай тэхнікі.
