Беластоцкая фундацыя „Tutaka” дасягнула свайго, каб падняць спадчыну легендарнага фестывалю „Басовішча”, які з-за арганізацыйных праблем скончыўся ў 2019 г. на юбілейным 30-тым выпуску. Стала вядома, што адноўленая імпрэза адбудзецца 6-7 жніўня ў тым самім месцы, у Барыку ў Гарадку. Пра гэта ў Радыё Рацыя паведаміў у канцы чэрвеня старшыня фонду Павел Станкевіч. Фестываль музыкі маладой Беларусі „Басовішча” ператвораны будзе ў Фестываль абуджаных беларусаў „Tutaka”.

Такая імпрэза мае быць маніхвестацыяй салідарнасці з беларускім народам, які змагаецца за свабоду і дэмакратыю. „Басовішча” таксама такую ідэю прыгожа здзяйсняла, збіраючы вакол рокавай сцэны на лясной паляне ў Гарадку беларусаў ад нас і з Беларусі, даючы магчымасць пачуцця нацыянальнай свабоды. Перадусім у выглядзе энергетычнай музыкі з тэкстамі, за якія ў сённяшняй Рэспубліцы Беларусь саджаюць за краты.

Фестываль „Tutaka” будзе мець аднак крыху іншы – шырэйшы – фармат, навязваючы да культурнай магутнасці Вялікага княства Літоўскага ў сучасным вымярэнні. Спісак выступоўцаў пакуль яшчэ невядомы. Напэўна зайграюць некаторыя гурты, якія выступалі на „Басовішчы”. З Беларусі з амаль закрытымі межамі гуртоў і ўдзельнікаў на жаль не будзе. Змогуць выступіць толькі музыкі, якія апынуліся ў эміграцыі. Напэўна ў Барык з’едзе і шмат беларускай дыяспары. Сярод публікі будуць вядома і беларусы з Падляшша, таксама палякі. Паколькі адноўлены фестываль гэта маніхвестацыя салідарнасці з Беларуссю на сцэне выступяць напэўна і польскія гурты.

Так як „Басовішча” Фестываль абуджаных беларусаў „Tutaka” пройдзе пад бела-чырвона-белымі сцягамі. Можна спадзявацца, што будзе іх мора.

У тым жа часе, 7 жніўня, побач у Міхалове адбудзецца беларускі фольк-фестываль „Прымацкая бяседа”. Там таксама, магчыма, будзе нейкі бел-чырвона-белы акцэнт. У гурце „Прымакі” спявае між іншым дачка Паўла Латушкі, Яна, якая ў знак салідарнасці з „абуджаным” беларускім народам 20 чэрвеня на Свяце беларускай культуры ў Беластоку расцягнула гістарычны бел-чырвона-белы сцяг.