19-20 ліпеня ў Барыку ў Гарадку пройдзе юбілейны, 30-ы па ліку, Фестываль музыкі маладой Беларусі „Басовішча”. 19 траўня арганізатары з Беларускага аб’яднання студэнтаў паведамілі, што будзе гэта апошні фестываль, арганізаваны БАСам (з самога пачатку, з 1990 г.). На старонцы ў фейсбуку адначасова напісалі, што „пакуль няма іншай арганізацыі, якая пераняла б гэтую ініцыятыву”.
Такое рашэнне студэнтаў не здзіўляе, калі глядзець на тое, як саматужна і спантанна заўсёды праводзілася „Басовішча”. Гэты фестываль хутка ператварыўся ў вялікую беларускую рок-імпрэзу. Тымчасам яго арганізацыя ўвесь час абапіралася на валанцёрах. Бюджэт фестывалю заўсёды быў невялікі, паколькі галоўныя грошы гэта датацыя Міністэрства ўнутраных спраў і адміністрацыі. Кошты імпрэзы раслі, а яна аставалася на нязменным а то і штораз меншым узроўні фінансавання. Іншых спонсараў знайсці было вельмі цяжка. Трэба было ратавацца зборам сродкаў у інтэрнэце. У гэтым годзе толькі ў такі спосаб удалося сабраць неабходную суму 15 тыс. зл.
Заяўляючы пра спыненне арганізавання Басовішча Беларускае аб’яднанне студэнтаў замыкае пэўна і існаванне самой арганізацыі. БАС даўно ператварыўся ў вузкае таварысцкае кола сяброў, якое, праўда, мянялася, але заставалася нешматлікім. Яго сябры жылі папраўдзе толькі Басовішчам. Відаць няма ўжо каму дзейнічаць у БАСе і арганізаваць Басовішча.
З’явілася аднак неафіцыйная інфармацыя, што сёлетні выпуск фестывалю ўсё ж такі не стане апошнім. Зрадзілася думка, каб паклікаць аднайменны з фестывалем фонд. У арганізацыйны фармат маглі б уключыцца таксама Радыё Рацыя і тэлеканал Белсат.
Тымчасам 24 траўня ў мінскім клубе Берлін адбылося „Адборышча” для маладых гуртоў з Беларусі на конкурсную частку сёлетняга „Басовішча”. Журы вызначыла пяцёх выканаўцаў. Гэта гурт Atesta з 14-гадовай вакалісткай, кабарэ-бэнд BarRokka, Harmonix College, поп-рокавая Paulinn і новы праект паэта Уладзя Лянкевіча luty sakavik.
