У вёсцы Плянта Нараўчанскай гміны Гайнаўскага павета беларускі штомесячнік „Часопіс” чытае пяць жыхарак і адзін жыхар, у тым ліку Вера Клімюк. Чытаць па-беларуску яна навучылася ў Пачатковай школе ў Круглым Ляску Міхалоўскай гміны Беластоцкага павета. Хадзіла са свае роднай вёсачкі Бяндзюга (яна распаложана на правым беразе Нарвы). Было ёй далекавата хадзіць. Вельмі любіла шыць сабе вопратку. Працавала ў швальні ў Міхалове. Калі выйшла замуж, пераехала жыць у Плянту. Шмат гадоў працавалі з мужам на гаспадарцы. Пабудавалі прыгожы дом. Спадарыня Вера варыць смачныя абеды, патрапіць спячы адмысловы торт і розныя хлебабулачныя вырабы. Вясной і летам спадарыня Вера садзіць каля хаты многа розных кветак. Яны цвітуць да позняй восені, цешаць зрок сваёй прыгажосцю і прыносяць ёй радасць. Вырошчвае розную агародніну, у тым ліку малавядомую дагэтуль у яе вёсцы.

Спадарыня Вера чытае родную газету шмат гадоў. Ёй „Часопіс” падабаецца па зместу і графічнай шаце. У кожным нумары шукае тэкстаў знаёмых ёй аўтараў. Заахвочвае чытаць „Часопіс” сваіх сябровак.

Тэкст і фота Янкі Целушэцкага