Ідзе падрыхтоўка да аднаўлення і рэканструкцыі мемарыяла „Хатынь” у Лагойскім раёне пад Мінскам. Будзе там пабудаваны яшчэ музей прысвечаны ахвярам з беларускага народа падчас Другой сусветнай вайны. Паколькі ёсць сігналы, што ўсе шыльды і надпісы будуць аформлены па-руску, узнікла грамадская ініцыятыва, каб да гэтага не дапусціць. Занепакоены людзі пачалі слаць звароты ў Мінскі аблвыканкам з заклікам, каб уся візуальная інфармацыя ў мемарыяльным комплексе была на беларускай мове. Найперш таму, што на ёй размаўляла насельніцтва вёсак пацярпеўшае ад фашыстаў, якому прысвечаны гэты асаблівы помнік „Хатынь”.

Быў аб’яўлены конкурс на канцэпцыю абнаўлення комплексу і цяпер разглядаюцца заяўленыя праекты. Аўтары зваротаў у Мінскі аблвыканкам пабойваюцца, што падчас рэканструкцыі цалкам скасуюць беларускую мову так, як у адкрытым некалькі гадоў таму мемарыяльным комплексе „Боркі” ў Кіраўскім раёне Магілёўскай вобласці. Там практычна ўсе надпісы на рускай мове.

Адкрыццё мемарыяльнага комплексу „Хатынь” адбылося 5 ліпеня 1969 г. Ён прысвечаны памяці 149-ці жыхароў гэтай неіснуючай ужо вёскі, якіх 22 сакавіка 1943 г. гітлераўцы загналі ў стадолу. Сцены аблілі бензінам і падпалілі. Ахвяры згінулі ў агні або ад стрэлаў з аўтаматаў і кулямётаў. Палова ахвяр зверскага злачынства былі гэта дзеці да 16-гадовага ўзросту. Усе загінуўшыя размаўлялі па-беларуску, не па-руску…

Фота з Вікіпедыі