28 красавіка Бельскаму дому культуры рада горада прысвоіла імя Маршала Юзэфа Пілсудскага. З такой прапановай яшчэ восенню мінулага году выступіла частка радных. Такая ж заява паступіла таксама ад Фонду аховы спадчыны Бельскай зямлі. Ініцыятары паклікаліся на сувязі сям’і Пілсудскіх з Бельскім паветам і горадам Бельск-Падляшскі, у якім перад вайною на месцы дзе стаіць гэты будынак знаходзіўся Народны дом такога ж імя.

Сярод жыхароў такая прапанова выклікала рознагалоссе. Бурмістр Бельска Яраслаў Бароўскі тэму паддаў грамадскім кансультацыям (пры дапамозе Фейсбука). Вынік не быў адназначны. Многія выказаліся супраць, паколькі ўспрынялі гэта як чарговую спробу надаць Бельску больш польскае патрыятычнае аблічча, паколькі гэты горад моцна асацыюецца з беларускасцю з увагі на такое паходжанне вялікай часткі жыхароў.

Падчас красавіцкай сесіі бельскія радныя па прапанове галасавалі тройчы. Два разы было столькі галасоў на так, што і на не. Астатнія ўстрымоўваліся. Канчаткова вынікам дзевяць за і сем супраць прапанова была прынята. Радная Яўгенія Крук прызналася, што гэта яе голас быў вырашальны і што прагаласавала памылкова.

Фота: bdkbielsk.pl