23 студзеня ў Маскве, Санкт-Пецербургу і сарака іншых гарадах Расіі адбыліся масавыя пратэсты супраць палітыкі прэзідэнта Уладзіміра Пуціна. Дэманстрантаў на вуліцу вывеў з-за кратаў апазіцыянер Аляксей Навальны. Быў ён арыштаваны ў палове студзеня, як толькі вярнуўся з Нямеччыны, дзе даходзіў да сябе пасля спробы атруты яго славутым «навічком», калі ў жніўні вяртаўся з Омска ў Маскву.

Цяпер пасля арышту Навальнага яго Фонд Змагання з Карупцыяй змясціў у інтэрнэце рапарт пра Уладзіміра Пуціна з амаль двухгадзінным фільмам, у якім паказана камфортная палац-рэзідэнцыя над Чорным морам як уласнасць расійскага прэзідэнта. Яе вартасць гэта 100 млд рублёў (каля 5 млд зл.). Ёсць там каля ста пакояў, зала з кіно, басейн, прыватны порт, царква, а нават памежны пераход. У фільме відаць каштоўную меблю, напрыклад столік за… 200 тыс. злотых. Паказана таксама залатая шчотка ддя ўнітаза, якая стала сымбалем студзеньскіх пратэстаў.

Афіцыйны Крэмль, вядома, запярэчыў, што гэты палац з’яўляецца ўласнасцю расійскага прэзідэнта. Сам Уладзімір Пуцін таксама сказаў, што гэта „каралеўства” не яго і нікога з яго сям’і.

Такое тлумачэнне ёсць цьмяным і крыху дзіўным. Прэс-сакратар Пуціна сцвердзіў, што „такі аб’ект напэўна існуе” і „з’яўляецца чыёйсці прыватнай уласнасцю”, але прыпісванне яе прэзідэнту Расіі гэта „ложь”. Але каб супакоіць народ, хапіла б жа проста паінфармаваць, чыя сапраўды гэта ўласнасць. Расійскія спецслужбы неяк доўга не маглі гэтага ўстанавіць. Урэшце ў канцы студзеня на Крамлі паінфармавалі, што ашаламляючая маёмасць ёсць нібыта ўласнасцю расійскага алігарха Аркадзія Ротэнберга. Вядома, аднак, што ён і Уладзімір Уладзіміравіч гэта сябры яшчэ з часоў дзяцінства ў Ленінградзе. Таму тое, што Пуцін не мае нічога супольнага з палацам над Чорным морам гэта пэўна такая самая праўда, як тое, што Лукашэнка выйграў прэзідэнцкія выбары. Калі дастаткова доказаў, што ён іх сфальшаваў.