З 25 ліпеня па 3 жніўня вучні з Беласточчыны, якія вывучаюць беларускую мову ў бельскай Тройцы ды школах у Гайнаўцы, Орлі, Залуках і Бабіках, пабывалі на летніку ў Нацыянальным дзіцячым цэнтры „Зубраня”. Адпачынак у гэтым былым славутым піянерскім лагеры паблізу возера Нарач, 150 км ад Мінска, сарганізаваў для іх Культурны цэнтр Рэспублікі Беларусь у Польшчы. Дзякуючы таму бацькі не мусілі поўнасцю плаціць грошай за адпачынак сваіх дзяцей, а кошт немалы, бо паводле цэнніка аплата за турнус гэта ў пералічэнні звыш 3 тысяч злотых.

У летнім лагеры ў цэнтры „Зубраня” вучні з Беласточчыны адпачывалі разам з аднагодкам з Беларусі ды былых савецкіх рэспублік. Турнус як за піянерскіх часоў пачаўся масавым афіцыйным адкрыццём. Выступ нашых дзяцей як адзіны прагучаў на беларускай мове, усе астатнія выступілі па-руску. Гэта выклікала вялікае ўражанне. – Я спачатку не зразумела хто гэта спявае, на чысцюткай беларускай мове, так прыемна, – сказала для Радыё Рацыя кіраўнічка лагера.

Падчас летніка дзеці з Беласточчыны наведалі таксама Мінск, Нясвіж, Мір ды Залессе.

Янка Целушэцкі