Pa prostu / Па-просту

Po pudlaśki / По-пудляські

  • Waśkowa spowed’ (1)

    Nadworie Styczeń sioho roku buw tepły i niemorozny. W Ryhoruwciach uże po tradycji bołoto, zemla rozmerzła. W miastowych czerewykach rozmemłeny kaluży preskokowaty treba, kob bołotom botiki ne barzo pobrudyty. Abo wody w ich ne nabraty. Peredom ide mużczyna pożyły, zhorbiany, pałkoju podperajetsia i ide czerez… ЧЫТАЦЬ ДАЛЕЙ / CZYTAJ DALEJ

RSS, Facebook i Telegram

Эпісталярый

Лісты Пятра Ластаўкі да Зоські Верас (2)

Зоська Верас і Пятро Ластаўка
Зоська Верас і Пятро Ластаўка

Мілянувак, 8 сакавіка 1967 года

Паважаная Грамадзянка!

Дзякую за прысланыя здымкі, бо я іх не бачыў ніколі. Калі зможаце, то дашліце другую адбітку Адама Бычкоўскага, бо я, магчыма, выкарыстаю ў прэсе.

Маркі атрымаў таксама, шчыры дзякуй унуку, хаця, несумненна, гэта Ваша ініцыятыва. Тут такія маркі цяжка дастаць, я маю на ўвазе цара-бацюшку. Сёння ўкладваю зноў чэхаславацкія 7 марак: кветкі, звяры, птушкі. І тры польскія: гарады. 

Успаміны асоб, якія Вам патрэбныя, я падрыхтую.

Са шчырым прывітанне Вам і Вашай сямейцы.

Адданы Пятро Ластаўка.

 

Мілянувак, 17 сакавіка 1967 года

Паважаная Грамадзянка!

Пасылку атрымаў. А гэта „Студэнцкая думка”, Варшаўскія ўспаміны і ўспаміны пра Гурток у Гародні і дапоўненыя ўспаміны пра Адама Бычкоўскага. Вельмі, вельмі дзякую Вам за гэта. Усё надта цікавае і спатрэбіцца, а перадусім Варшаўскія ўспаміны, бо я шырэй працую над Беларускім рухам у Варшаве. Урывак быў надрукаваны ўжо ў „Ніве”.

Маркі паштовыя з Купалам і Коласам таксама атрымаў, дзякую. Толькі не крыўдуйце ўнука. Мне могуць быць абы якія, не вышуканыя, а толькі з „масоўкі” маркі ўсе могуць быць аднолькавыя, не купленыя – тады я маю пры іх найбольш занятку.

Ці атрымалі Вы здымак і некалькі слоў пра Сароку?

У сувязі з надыходзячым святам Вялікаднем дасылаю Вам і Вашай сямейцы самыя найлепшыя пажаданні. Хрыстос Уваскрос!

Пятро Ластаўка.

 

Мілянувак, 8 красавіка 1967 года

Паважаная Грамадзянка!

Вельмі дзякую за лісты ад 29 сакавіка і 2 красавіка 1967 года. Даруйце, што я замарудзіў з адказам. Прыкра, што адчуваеце сябе слабавата, як пішаце ў пісьме ад 2 красавіка. Трымайцеся!

За „Студэнцкую думку” і іншае прысланае 17 сакавіка найшчырэйшае дзякуй, хоць, здаецца, што я ўжо выказваў Вам падзяку падчас атрымання, але другі раз падзякаваць, гэта не пашкодзіць. А цяпер адказваю на пытанні.

Успаміны Вашы для мяне вельмі каштоўныя, а тым больш Варшаўскія, дзеля таго, што я пішу даследаванне „Беларусы ў Варшаве”. Гэта праца ахоплівае не толькі арганізаваны рух, але, наогул, калі знайшліся беларусы, першыя беларусы ў Варшаве, пачынаючы ад Люблінскай уніі. Цяжка над гэтым працаваць, бо няма матэрыялаў, а мінулыя легенды не перадаваліся.

Большае было насілле беларускага руху ў Варшаве, пачынаючы з 1905 года, але і тут толькі вусныя пераказы. Ці Вы не прыпамінаеце сабе, як былі ў Варшаве, бо была тут падобная арганізацыя ў Варшаўскім універсітэце „Зямляцтва” пад апекай вядомага вучонага і тадышняга рэктара Карскага. Ладзілі беларускія вечары ў „Даліне швейцарскай”, а пазней – тэатр Буйніцкага супольна з „Зямляцтвам” выступалі ў той жа „Даліне”, моцна падкрэсліваючы характар, што яны беларусы. Другія зноў кажуць, што былі гэта імпрэзы толькі дзеля матэрыяльнай карысці. Ці не ведаеце асоб, якія пражываюць у Варшаве і цяпер, якія можа памятаюць тую пару, калі гэта адбывалася? 

Прозвішча Сталыгваў мне не чужое, але не ведаю, ці ён жыве, ці яго сям’я жыве і дзе яны. Цікавіць мяне і лёс Галубянкі і Смоліча.

Кожная вестка для мяне – жыцця і руху беларускага ў Варшаве – на вагу золата. Перакладу „Святы Божа” нідзе не сустракаў, чаго вельмі шкадую, але маю гэта на ўвазе.

Цяпер адносна нашага працэсу за Грамаду ў 1929 годзе. Быў ён у першых днях жніўня, а 5-га жніўня быў абвешчаны прысуд. Акты з гэтага працэсу знаходзяцца сёння ў Цэнтральным дзяржаўным архіве Літоўскай ССР у Вільні, вуліца Міндоўга. Там і мой акт абвінавачвання. Мяне Вы не зналі і таму не прыпамінаеце мяне. Я быў асуджаны пад нагляд паліцыі і быў якраз пакліканы на чынную вайсковую службу. Можа маеце якія-небудзь выразкі з гэтага працэсу.

Што датычыць рэгістрацыі Беларускага асветнага таварыства ў Варшаве, то адмова была на легалізацыю з камісарыяту ўрада, а Адам Бычкоўскі склаў рэкурс ў Міністэрства і туды хадзіў. Міністэрства таксама адмовіла яшчэ пры яго жыцці, але ён падрыхтаваў новыя дакументы на рэгістрацыю толькі ў межах Варшавы. Пасля яго смерці, гэта значыць у снежні 1937 года, мы самі аддалі дакументы на рэгістрацыю. Да гэтай пары працавалі нелегальна. У сваёй храналогіі працы „Беларусы ў Варшаве” будзе ўсё дакладна пададзена.

„Бэтэска” – гэта на польскай мове назоў нашага тут таварыства „Bial.Tow.Spol.Kult.”. Сярод першых літар устаўлена „э”, а „к „зменена на „ц” (у польскім) з лаціны, каб выглядала нешта з чужога, бо тут ёсць людзі па гэтых пытаннях вельмі чулыя. А з гэтым „э” выйшла „Betesca”.

Адбітка Адама Бычкоўскага добрая. За маркі найвялікшае дзякуй. Толькі не купляйце і не высылайце чыстых, не рабіце сабе клопатаў. Якраз вось добра, як апошнія прыслалі найбольш папулярныя і масавыя. Спытайце ўнука, ці яго цікавяць маркі іншых краін і якіх? Я магу выслаць. Сёння наклейваю яшчэ з серыі кветак і пару штук ўкладваю ў сярэдзіну розных краін, 12 штук.

Дасылаю здымак Сяргея Сарокі, можа там ёсць дзесь яго родныя, можна было б перадаць, мне яны непатрэбныя. Я быў на яго паховінах.

Трэба ўжо канчаць пісаць, бо надакучыць Вам чытаць. 

Усяго найлепшага для Вашай сямейкі, а Вам перад усім жадаю многа, многа здароўя!

Адданы Пятро Ластаўка.

 

Мілянувак, 16 мая 1967 года

Паважаная Грамадзянка!

Пісьмы нашы апошнія размінуліся, хіба ў дарозе, але гэта нічога.

Дзякую вельмі за ліст, маркі, а асабліва за артыкул Новіка пра Карскага. Ці трэба яго вяртаць Вам? Як Ваша здароўе? Маё добрае, ведама, „не тое, што было калісьці”, як кажа Максім Танк у „Нарачы”, але чуюся добра.

Ад Клімовіча ліст атрымаў, рыхтую матэрыялы, якія неаднаразова трэба яшчэ спраўдзіць, каб не ўпусціць нечага непраўдзівага. Гэта ж гісторыя – павінна быць абапёртая на праўдзе – маральная адказнасць за гэта вялікая.

Пакуль што ўсё. Добрага Вам здароўя, прывітанне ў хаце.

Пятро Ластаўка.

Падрыхтаваў

Сяргей Чыгрын

Календарыюм

Гадоў таму

  • у лістападзе

    685 – у 1341 г. войскі Вялікага Княства Літоўскага акружылі крыжацкую цьвердзь Баербург і прыступілі да яе здабыцьця. Падчас атакі загінуў вялікі князь Гедымін. 210 – 4.11.1816 г. у мястэчку Кублічы каля Лепеля нар. Арцём Вярыга-Дарэўскі (пам. у ссылцы ў Сібіры …ЧЫТАЦЬ ДАЛЕЙ / CZYTAJ DALEJ

Новы нумар / Novy numer

Папярэднія нумары / Poprzednie numery

Усе правы абаронены; 2026 Czasopis
Social Media Auto Publish Powered By : XYZScripts.com