Мікалай Кардаш – ураджэнец Семяноўкі Нараўчанскай гміны Гайнаўскага павета. Быў адным з дзяцей сялянскай сям’і. Яго дзяцінства прайшло ў вёсцы. Хадзіў у пачатковую школу ў родным сяле. Тут беларуская мова была адным з абавязковых прадметаў навучання. Дома дапамагаў бацькам у працы на гаспадарцы.
Далей пайшоў вучыцца ў прафесійную школу ў Гайнаўцы — на столяра. Палюбіў гэтую прафесію. Калі стаў паўналетнім, яго прызвалі ў армію. Быў здатным салдатам і службу ў войску закончыў з двумя гэтак званымі „бэлькамі” на пагонах мундзіра, быў капралем.
На заработкі ездзіў на айчынныя і замежныя вялікія новабудоўлі. Аднак цягнула яго ў родную вёску, да сваіх людзей і ён вярнуўся ў бацькоўскі родны дом, у якім зараз жыве. Цяпер яго драўляны і таму найбольш прыязны чалавеку дом адзін з прыгажэйшых у Семяноўцы. Ён адмыслова ашаляваны ды густоўна памаляваны. Панадворак у солтыса мае нешта такое блізкае, свойскае – ён здаўна, між іншым, з жураўлём пры студні.
Вяскоўцы выбралі Мікалая Кардаша на солтыса. Я быў таксама солтысам і мы падружылі. Мы любім нашае вясковае жыццё-быццё. Ужо будзе нямала гадоў, як семяноўскі солтыс пачаў чытаць „Часопіс”. Я яго толькі заахвоціў да чытання беларускага штомесячніка. У нас ён самым лепшым ды пажаданым госцем. Мы ад яго многа чаго што даведваемся. „Часопіс” для нас цікавая газета і мы будзем яе чытаць.
Тэкст і фота Янкі Целушэцкага
